Тошкентда ижтимоий тармоқларда Real Sanjik номи билан танилган блогер Санжар Каримовнинг қўлга олингани жамоатчилик орасида катта муҳокамаларга сабаб бўлди. Олий суд матбуот хизматининг расмий хабарига кўра, жиноят ишлари бўйича Миробод туман суди 28 ноябр куни Каримовга нисбатан қамоққа олиш тарзидаги эҳтиёт чорасини тасдиқлаган.
Маълумотларга қараганда, блогерга нисбатан бир нечта оғир айбловлар илгари сурилган: ўлдириш ёки куч ишлатиш билан қўрқитиш, гиёванд моддалар ёки психотроп воситаларни ноқонуний тарзда тайёрлаш, сақлаш, ташиш ва айланмага киритишга уриниш каби жиноятлар бўйича гумонланмоқда. Тергув органлари ушбу ҳаракатлар Жиноят кодексининг бир нечта моддаларига мос келиши мумкинлигини маълум қилган.
Суд томонидан келтирилган баёнотда айтилишича, прокуратуранинг илтимосномаси тўлиқ қондирилган ва Санжар Каримов тергов ҳибсхонасига жойлаштирилган. У 1990 йилда Наманган вилоятида туғилган бўлиб, “Финанс Инвест” КСБ асосчиларидан бири ҳисобланади.
“Қочоқ куёв” иши ва Каримовнинг роли
Блогер атрофидаги можаро асосан Тошкентда яшовчи Жамила Олимбоеванинг шикоятидан кейин кенгайган. Олимбоева ўз ёрдамидаги Шаҳзод Рисматовни фирибгарликда айблаб, ундаги уйини алдаш йўли билан Санжар Каримов номига расмийлаштириб берилгани ва эвазига Рисматов қарзга пул олганини айтган.
Бу даъволар пайдо бўлгач, Санжар Каримов ўз позициясини очиқ билдириб, уйни 240 минг доллар нақд пул эвазига сотиб олганини таъкидлаган. Унинг айтишича, бу келишув Рисматов билан уларнинг шахсий бизнес муаммоларига алоқаси йўқ.
«Мен уйни ўз маблағимга сотиб олдим. Уларнинг бизнеси муваффақиятсизликка учраган бўлса, бу менга тегишли эмас. Мен уларга ёрдам мақсадида уйни харид қилганман», — деганди Каримов.
Рисматов иши бўйича суд ҳукми
21 ноябрь куни ЖИБ Мирзо Улуғбек туман суди Шаҳзод Рисматовга нисбатан биринчи инстанциядаги очиқ суд жараёнини якунлаб, уни жуда кўп миқдорда фирибгарлик содир этганликда айбли деб топди. Суд Рисматовга 9 йил озодликдан маҳрум қилиш жазосини тайинлади.
Шу билан бирга, судья алоҳида ажрим чиқариб, Санжар Каримовнинг ушбу жиноят ишидаги иштироки ва унга оид муомалаларининг қонунийлиги юзасидан қўшимча текширув ўтказиш учун прокуратурага хабарнома юборган.
Ҳозирги вазият нима деяпти?
Real Sanjik'нинг қўлга олиниши ва унга қарши илгари сурилаётган айбловлар ижтимоий тармоқларда катта резонанс келтириб чиқарди. Бир тараф блогерни айблаётган бўлса, бошқалар мавжуд ишларда унинг ролини аниқлаш учун ҳаққоний тергов кераклигини таъкидламоқда.
Айни пайтда, Санжар Каримовнинг иши бўйича тергов ҳаракатлари давом этмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
