Сурхондарё вилоятида коррупцияга қарши кураш доирасида навбатдаги кескин ҳолат фош этилди. Давлат хавфсизлик хизмати вилоят бошқармаси ҳамда вилоят прокуратураси ҳамкорлигида ўтказилган тезкор тадбир давомида Божхона бошқармасининг Контрабандага қарши курашиш бўлимида фаолият юритувчи катта тезкор ходим ашёвий далиллар билан ушланди.
Маълумотларга кўра, мазкур мансабдор шахс фуқародан ноқонуний равишда 400 АҚШ доллари олаётган вақтида қўлга олинган. Тергов жараёнида аниқланишича, у хизмат ваколатларидан фойдаланиб, Термиз туманида истиқомат қилувчи фуқаронинг 20 минг АҚШ долларини тегишли декларация ҳужжатларини расмийлаштирмасдан, таниш-билишлари орқали “Сариосиё” чегара божхона пости орқали Тожикистон Республикасига олиб ўтишни ваъда қилган.
Бу ҳаракат орқали у қонун талабларини четлаб ўтиш, шунингдек, молиявий манфаат орттиришга урингани қайд этилмоқда. Ҳуқуқни муҳофаза қилувчи органлар томонидан мазкур ҳолат юзасидан барча далиллар йиғилиб, тегишли процессуал чоралар кўрилмоқда.
Айни пайтда ушбу шахсга нисбатан Ўзбекистон Республикаси Жиноят кодексининг 168-моддаси 3-қисми “в” банди ҳамда 25, 211-моддаси 1-қисми асосида жиноят иши қўзғатилган. Тергов ҳаракатлари давом этмоқда.
Мазкур ҳолат давлат органларида қонун устуворлигини таъминлаш, коррупцияга муросасиз муносабатни шакллантириш йўлида олиб борилаётган қатъий чора-тадбирлар яна бир бор амалий натижа бераётганини кўрсатмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
