8 январдан бошлаб автомобилларга метан газ тўлдириш компрессор шохобчалари (метан заправкалар) янги вақт тартибида ишлайди: ҳар куни соат 10:00 дан 16:00 гача. Бу ҳақда Энергетика вазирлиги расмий маълум қилди.
Вазирлик изоҳига кўра, магистрал газ қувурларида босим пасайиши кузатилаётгани сабабли зарур чоралар кўрилмоқда. Бу вазиятда энг биринчи навбатда аҳоли хонадонлари ҳамда ижтимоий соҳа объектларини табиий газ билан узлуксиз ва барқарор таъминлаш устувор вазифа сифатида белгиланган. Шу боис, маҳаллий ҳокимликлар билан келишилган режа-графиклар асосида метан заправкалар фаолиятига вақтинча чеклов киритиляпти.
Фарғона водийсида эса тартиб янада “жойига қараб” бўлади: у ерда метан заправкаларнинг иш вақти ҳокимликлар билан келишилган ҳолда, газ босими ва умумий таъминотдан келиб чиқиб белгиланади. Яъни, босим тушган пайтларда биринчи бўлиб аҳоли, жамоат транспорти ва ижтимоий аҳамиятга эга объектлар ёқилғи билан таъминланиши таъминланади. Бу — транспортнинг тўхтаб қолмаслиги, мактаб-боғча, шифохона, муҳим муассасалар ва уйлардаги иситиш тизимлари барқарор ишлаши учун қилинaётган чора.
Вазирлик яна бир нарсани алоҳида таъкидлади: бу чекловлар вақтинчалик. Ҳозир газ босимини меъёрга келтириш бўйича амалий ишлар олиб бориляпти ва вазият барқарорлашиши билан иш режими қайта кўриб чиқилиши мумкин.
Эслатма сифатида: метан заправкалар фаолиятига чеклов 12 декабрдан бошлаб киритилган, бу қарор қўшни давлатдаги газ тармоғидаги техник носозлик сабаб импорт табиий газ ҳажми қисқаргани билан изоҳланган эди. Кейинчалик, 30 декабрдан барча метан заправкалар 24 соатлик иш режимига қайтарилган. Энди эса газ босими билан боғлиқ ҳолат сабаб яна қисқа иш вақтига ўтиляпти.
Ҳайдовчиларга маслаҳат: йўл режангизни олдиндан тузинг, заправкага шошилинч эмас, “тайм-менежмент” билан боринг. Янги тартиб вақтинча, лекин сабр қилсак, асосийси — уйлар ва муҳим объектлар газсиз қолмайди.
“Zamin”ни Telegram'да ўқинг!
