Андижон вилояти божхона бошқармаси ходимлари “Дўстлик” чегара божхона пости орқали катта миқдордаги нақд валюта олиб чиқиб кетишга уринишнинг олдини олди. Гап 18 800 АҚШ доллари ҳақида кетяпти — маблағ оддий сумка ичида, ҳаммаси тинчдек кўринадиган жойга жойлаб қўйилган.
Маълум қилинишича, чегарадан ўтаётган фуқаро божхона назоратидан ўтишда қизил йўлакни танлаган. У ўз ёнида белгиланган меъёр доирасида валюта борлигини билдириб, божхона декларациясини ҳам тўлдирган. Ҳужжатлар расмийлаштирилгандан кейин эса божхона ходимлари фуқаронинг қўл сумкаларини текширувдан ўтказган.
Текширув пайтида қизиқ ҳолат кузатилди. Оғзаки сўровда фуқаро сумкада қариндошлари учун олинган нон ва қанд-қурс борлигини айтган. Лекин айнан ўша нонлар орасида 18 800 доллар яширилгани аниқланди. Қисқаси, “совға-салом” деб кўрсатилган сумканинг ичидаги “асосий ингредиент” бошқача чиқди.
Ҳозирда ушбу ҳолат бўйича дастлабки суриштирув ишлари олиб борилмоқда. Маблағ қандай мақсадда олиб чиқилмоқчи бўлгани, қаерга йўналтирилгани ва бошқа тафсилотларга тергов жараёнида ойдинлик киритилади.
Эслатиб ўтамиз, қонунчиликка кўра, жисмоний шахслар 100 миллион сўмгача бўлган нақд валютани белгиланган тартибда чекловсиз олиб чиқиши мумкин. Шунинг учун чегарадан ўтишда энг тўғри йўл — маблағни яшириш эмас, балки қоидага амал қилиш. Чунки божхонада “нон” ҳам текширилади — айниқса, нон орасида “валюта қиртилласа”.
“Zamin”ни Telegram'да ўқинг!
