Тошкентда йирик ёнғин: омборхона алангага ўранди
Тошкент шаҳрининг Яшнобод туманида 29 апрель куни омборхонада йирик ёнғин содир бўлди. Фавқулодда вазиятлар бош бошқармаси маълумотларига кўра, ёнғин соат 17:05 да бошланган ва тезда қутқарув экипажлари жойига етиб борган. Ҳозирда ёнғин қуршаб олинган, аммо уни тўлиқ ўчириш ишлари давом этмоқда. Жабрланганлар ҳақида маълумот йўқ, сабаблари эса аниқланмоқда.
Бугун, 29 апрель куни Тошкент шаҳрининг Яшнобод туманида жойлашган омборхоналардан бирида ёнғин содир бўлди. Бу ҳақда пойтахт Фавқулодда вазиятлар бош бошқармаси маълум қилди.
Дастлабки маълумотларга кўра, ҳодиса Тошкент халқа автомобил йўли кўчасидаги омбор ҳудудида юз берган. Соат 17:05 атрофида ёнғин ҳақида хабар келиб тушган ва орадан атиги уч дақиқа ўтиб, яъни 17:08 да қутқарув экипажлари воқеа жойига етиб борган.
Мутахассислар томонидан тезкор чоралар кўрилиб, ёнғин соат 17:30 га келиб қуршаб олинган. Ҳозирда уни тўлиқ ўчириш ишлари давом этмоқда.
Расмийларнинг билдиришича, ҳодиса оқибатида жабрланганлар ҳақида маълумот келиб тушмаган. Шу билан бирга, вазият тўлиқ назорат остига олинган бўлиб, ёнғиннинг келиб чиқиш сабаблари аниқланмоқда.
Фавқулодда вазиятлар хизмати томонидан қўшимча маълумотлар берилиши кутилмоқда.
Изоҳлар 0
…