Мушукларни овқатлантиргани учун жаримага тортилган пенсионер аёл вафот этди

Тошкент вилоятининг Чирчиқ шаҳрида мушукларни овқатлантиргани учун жаримага тортилган пенсионер аёл вафот этди. Бу ҳақда “Меҳр ва Оқибат” ҳайвонларни ҳимоя қилиш жамияти маълум қилди.

Маълумотларга кўра, аёл қўшниларнинг шикоятидан сўнг кўчадаги мушукларни боқаётгани учун маъмурий жавобгарликка тортилган. У билан бирга серебрал фалаж ташхиси қўйилган набирасига ҳам жарима қўллангани айтилмоқда. Волонтёрларнинг сўзларига кўра, пенсионер ушбу ҳолатни жуда оғир қабул қилган.

Ташкилот юристлари жаримани бекор қилиш мақсадида судга мурожаат қилиш учун ҳужжатлар тайёрлаб, аёлга ҳуқуқий ёрдам кўрсатган. 22 июль куни волонтёрлардан бири зарур ҳужжатларга имзо қўйдириш учун унинг хонадонига борган. Бироқ бир неча бор тақиллатишига қарамай, эшикни ҳеч ким очмаган.

Шундан сўнг маҳалла раиси ва профилактика инспектори воқеа жойига чақирилган. Кейинчалик Фавқулодда вазиятлар вазирлиги ходимлари квартира эшигини очганида, ичкаридан пенсионер аёлнинг жасади топилган.

Ҳозирча аёлнинг ўлими сабаби расман эълон қилинмаган. Ҳолат юзасидан тегишли идоралар томонидан суриштирув ишлари олиб борилмоқда.