Андижонда уйини қиморхонага айлантирган эркак қўлга олинди (видео)

Андижон вилоятининг Пахтаобод туманида яшаш хонадонида ноқонуний қимор ўйинларини ташкил этиб келган эркак ички ишлар органлари томонидан қўлга олинди. Бу ҳақда вилоят ИИБ ахборот хизмати маълум қилди.

Қайд этилишича, ўтказилган тезкор тадбир давомида хонадон мунтазам равишда қимор ўйинлари ўтказиладиган жойга айлантирилгани аниқланган. Ҳодиса жойидан 3 миллион 297 минг сўм нақд пул ҳамда қимор ўйинларида фойдаланилган ўйин карталари ашёвий далил сифатида расмийлаштириб олинган.

Мазкур ҳолат юзасидан гумонланувчига нисбатан Жиноят кодексининг 278-моддаси билан жиноят иши қўзғатилган. Ҳозирда ушбу ҳолат юзасидан тергов ҳаракатлари давом эттирилмоқда.