Тошкентда ўқувчи ўз ўқитувчисини калтаклади

Шу кунларда ижтимоий тармоқларда 10-синф ўқувчиси ўзининг физика ўқитувчисини калтаклагани ва бурнини синдиргани ҳақидаги хабар тарқалди. Эътиборингизга шу хабарни ҳавола этмоқчимиз.

Тошкентдаги 160- мактаб ўқувчиси 24 октябрь куни дарс пайтида физика ўқитувчисини уриб, унинг бурнини синдирди. Мактаб раҳбарияти фикрича, жанжал ўқитувчининг айби билан бошланган.

Воқеа гувоҳи бўлган ўқувчилардан бирининг айтишича¸ жанжал физика ўқитувчиси Денис Рундаев синфдаги ўқувчи қизга «телефон қулоқчинини ечиб қўй» дея танбеҳ бергани ортидан чиққан. Синфдошини ҳимоя қилган М. А. исмли 10- синф ўқувчиси ўқитувчини «уриб ташлаган».

Воқеани ўрганаëтган шаҳар халқ таълими бошқармаси мулозимининг айтишича, 160- мактаб ўқитувчисининг бурни сингани, юзи ва қорнига тан жароҳати етказилгани борасида тиббий маълумотнома мавжуд.

Ўзини «160- мактаб директори Ирина Казакованинг ëрдамчисиман», деб таништирган аëлнинг айтишича, «бурни синган ўқитувчи уни жабрлаган ўқувчининг узрини қабул қилган». «Биз бу воқеа юзасидан ота-оналар мажлиси чақирдик. Боланинг отасига нисбатан тушунтириш ишларини олиб бордик. Бола ўқитувчисидан кечирим сўради. Физика ўқитувчисининг ўзи жанжални биринчи бошлаганини тан олди. Денис Александровичнинг ўзи болани уришни биринчи бошлаган. Бола ўзини ҳимоя қилган», деди Ирина Казакова.

160- мактабнинг исми сир қолишини истаган ўқитувчисининг айтишича, мактаб раҳбарияти «воқеани бости-бости қилишга уринмоқда». «Мажлисда мен ҳам қатнашдим. Директоримиз «бу гап мактабдан ташқарига чиқмасин», деб қаттиқ тайинлади. Физика ўқитувчиси ҳам директорнинг босими остида аризасини қайтариб олди. Ўқитувчига қўл кўтарган ўқувчи ёмон хулқи туфайли коллеждан ҳайдалган. Отаси келиб уни ўзидан икки ëш кичкиналар ўқийдиган синфга жойлаб кетганди. Шу боланинг зўравонлиги дастидан ҳеч кимга кун йўқ».

Яккасарой туман ИИБ бошлиғининг ёшлар билан ишлаш бўйича ўринбосари «ўқитувчига қўл кўтарган ўқувчига нисбатан тарбиявий чора кўрилганини» айтди.

160- мактабнинг ўқитувчиларидан бири мактабдаги бу жанжал ортида ўқувчиларни ота-оналарига қараб табақалашаëтганини айтди. Унинг фикрича, ўқитувчини урган ўқувчининг отаси мактабга моддий ëрдам кўрсатган. «Шу боис бу ўқувчи ўзини доим баланд олиб юради. Мактабдаги ўқувчилар яхши ўқийдиган ва ëмон ўқийдиганларга эмас, балки ота-онаси мактаб фондига ëрдам берадиган ва бермайдиганларга ажралган», — дейди у. Суҳбатдошимиз бу амалиëтга қарши бўлган уч нафар ўқитувчи жорий ўқув йилида ариза ëзиб мактабдан бўшаб кетганини маълум қилди. “Замин” янгиликларини “Telegram”да кузатиб боринг