Тошкентда жиноий гуруҳ қарияларни тунаб сўнг ўлдириб юборганлиги ошкор бўлди (видео)

Қинғир ишнинг қийиғи қирқ йилда ҳам чиқади деган нақл бежиз айтилмаган. Жумладан, 1965 йилда туғилган Инобат Алматова ўз жиноий шериклари билан кекса ва ногиронларнинг ишончига кириб, уларнинг мол-мулкини ўзлаштириб, сўнгра эса тузоғига илинган қурбонларини ваҳшийларча ўлдириб юборишган.

1996 йилнинг январ ойида у фуқаро Гулсара Сафаровага ўзини Бухоро вилоятидан келган Гули исмли тадбиркор сифатида таништиради. Жиноятчи гўёки «Қўйлиқ» ҳамда «Миробод» деҳқон бозорларига гуруч ва ўсимлик ёғини сотиш учун олиб келганлигини айтади. Вақтинчалик яшаб туриш учун уй сўраб Гулсара Сафарованинг ишончига киради. Аёл унга ўз хонадонидан жой беради. Орадан бир неча кун ўтгач хонадон эгаларининг уйда йўқлигидан фойдаланиб, Алматова Гулсара Сафарова ва унинг оила аъзоларига тегишли жами 321 миллион сўмдан ортиқ қимматбаҳо буюмларини ўғирлайди. Ўша йиллари олиб борилган қидирув-суриштирув ишлари талончини топишда ҳеч қандай натижа бермайди.

Талончи аёлнинг кейинги ўлжаси 1921 йилда туғилган кекса ёшли Мария Шишкина бўлди. Уйда ёлғиз яшайдиган қария онахон ҳам Инобат Алматованинг алдовларига ишонади. Кунларнинг бирида Алматова жиноий шериклари Санжар Қўчқоров ва Гули исмли жувон билан Мария Шишкинанинг уйига турли ширинлик ва егуликлар кўтариб келади. Олиб келинган торт бўлагига кучли таъсирга эга кучли уйқу дори қўшилган бўлиб, қария ухлагач ўз режаларини осонгина амалга оширишлари керак эди. Аммо Шишкина ширинлик егиси келмаётганлигини айтиб ундан бош тортади. Режаси чиппакка чиқишини хоҳламаган жиноятчилар ваҳшийликка қўл уришади. Кекса аёлнинг боши ва танасининг турли қисмларига қаттиқ жисм билан қайта-қайта зарба беришади ва оқибат уни бўғиб ўлдиришади. Уйдаги қимматбаҳо буюмларни қўлга киритишгач, жиноят жойидан яширинишади ва қўлга киритилган буюмларни сотиб пулини «арра» қилишади.

Шундан сўнг жиноятчилир осон йўл билан яна ва яна пул топишга муккасидан кетишади.

Ўша йиллари ёлғиз фуқаролар ўз уйларини вақтинчалик ижарага бериш одат тусига кирган бўлган. Бу эса ғараз ниятли кимсалар учун айни муддао бўлади. 1996 йилнинг май ойида навбатдаги ўлжани учратишади. Алматова Тошкент шаҳрининг Мирзо Улуғбек туманида истиқомат қилувчи Александра Хрюкина билан танишиб қолади. Кекса аёл ўз уйини ўзини Хоразмликман деб таништирган Алматовага беришга қарор қилади. Шундан сўнг Алматова хонадонда яшаб ўз разил режасини амалга ошириш учун пайт пойлай бошлайди. Кунларнинг бирида Хрюкинанинг эри бетоб бўлиб касалхонага тушиб қолади. Пайтдан фойдаланиб шериклар олдиндан келишиб олинган режага кўра жабрланувчининг уйига алдов йўли билан кириб олишади. Бу сафар ҳам ўз «ўлжа»ларини аввалгидек шафқатсизларча ўлдиришади. Уй эгасини гумдон қилиб бўлишгач, унга тегишли буюмларни олиб хонадондан чиқиб кетишаётганда сергак қўшнилар шубҳали меҳмонларни чўчитиб юборишади. Аммо жиноятчилар ҳамма нарсани ташлаб, воқеа жойидан яширинишга улгуришади.

Ушбу гуруҳ 1996 йилдан 2004 йилга қадар худди юқоридаги каби ўғрилик ва ваҳший қотиллик сингари жиноятларни содир этишади. Уюшган жиноий гуруҳнинг содир этган жиноятлари Ўзбекистон Республикаси Бош прокуратурасининг ўта оғир жиноятларни тергов қилиш бошқармаси томонидан фош этилди. Жиноятчилар 38 та ҳолат юзасидан суд қилиниб, узоқ йилларга озодликдан маҳрум қилинади. Юқорида ҳикоя қилинган 3 та ҳолат эса 2018 йилга келибгина очилди. Зеро ҳеч бир жиноят жазосиз қолмайди.