Бош прокуратура валютани ноқонуний алмаштирганлар учун жавобгарликни кучайтиришни таклиф қилди

Қонунчилик палатаси депутатлари 22 ноябрь куни бўлиб ўтган мажлисда хорижий валютани ноқонуний алмаштирганлар учун жиноий ва маъмурий жавобгарликни кучайтириш тўғрисидаги қонун лойиҳасини кўриб чиқди.

Бош прокуратуранинг иқтисодий жиноятларга қарши курашиш Департаменти ушбу қонун лойиҳасининг ташаббускори бўлган ва улар биргаликда ҳужжат ишлаб чиқишган. Бу ҳақда Turon24га Бош прокуратура маълум қилди.

Қонун лойиҳасида қуйидагилар таклиф этилади:

а) Маъмурий жавобгарлик тўғрисидаги кодекснинг 170-моддаси санкциясига ўзгартириш киритиш орқали валюта қимматликларини қонунга хилоф равишда олиш ёки ўтказиш учун ўн беш сутка муддатга маъмурий қамоққа олиш жазосини белгилаш ва жарима миқдорини ошириш;
б) Жиноят кодекси 177-моддаси санкциясига қуйидаги ўзгартиришлар киритиш:

• 1-қисмидан валюта қимматликларини қонунга хилоф равишда олиш ёки ўтказиш учун белгиланган миқдорни чиқариш;
  
• янги 2-қисм билан тўлдириш орқали анча миқдорда валюта қимматликларини қонунга хилоф равишда олганлик ёки ўтказганлик учун жавобгарлик белгилаш;
  
• барча қисмлари бўйича жавобгарликни оғирлаштириш.
  

Қонун лойиҳасини ишлаб чиқувчилар унинг қабул қилиниши бу тоифадаги ҳуқуқбузарликлар профилактикаси самарадорлигининг ошишига, аҳолининг чет эл валюталарини айирбошлаш шохобчалари орқали харид қилиш даражасининг ўсишига хизмат қилишини айтмоқда. Шунингдек, иқтисодиётда хуфиёна секторнинг даражасини камайтиришга ва чет эл валютасининг назоратсиз чиқиб кетиш каналларини бартараф этишга олиб келиши кутилмоқда.

Бош прокуратура ҳузуридаги Департамент органлари томонидан ўтказилган таҳлиллар бу тоифадаги жиноятчиликнинг кескин ўсиш ҳолатларини кўрсатмоқда: биргина жорий йилнинг 9 ойида 2 069 та (2017 йил шу даврида – 1 656) шундай ҳуқуқбузарлик аниқланган.

Шуни инобатга олган ҳолда тайёрланган қонун лойиҳаси билан Маъмурий жавобгарлик тўғрисидаги кодекснинг 170-моддаси, Жиноят кодекси 177-моддасининг санкциясига ўзгартириш киритиш орқали валюта қимматликларини қонунга хилоф равишда олиш ёки ўтказиш учун жазо чораларини белгилаш ҳамда жарималар миқдорини ошириш кўзда тутилмоқда.

Қонунчилик палатасининг хабар беришича, қонун лойиҳаси биринчи ўқишдан ўтган. Ҳужжатни иккинчи ўқишда кўриб чиқиш муддати ҳали номаълум. “Замин” янгиликларини “Одноклассники”да кузатиб боринг