Тошкентда 6 та машина иштирокида ЙТҲ юз берди

2018 йилнинг 1 декабрь куни фуқаро Ў.Ё. “Hyundai” автомашинасини Тошкент шаҳар Олмазор туманининг Сағбон кўчасида ҳайдаб кетаётиб, тўсатдан соғлиги ёмонлашганлиги сабаб бошқарувни эплай олмай йўлни кесиб ўтаётган пиёда Т.И. (аёл)ни уриб юборган.

Ўзбекистон Республикаси ИИВ Жамоатчилик ва оммавий ахборот воситалари билан алоқалар бошқармаси хабарига кўра, шундан сўнг у қарама-қарши йўналишга чиқиб кетиб, қаршисидан келаётган иккита “Дамас”, “ВАЗ-2106”, “Исузу” ҳамда “Спарк” русумли автомашиналари билан тўқнашув содир этган.

Натижада “Hyundai” автомашинаси ҳайдовчиси Ў.Ё. касалхонада вафот этган. Пиёда Т.И. жароҳат олиб касалхонага ётқизилган.

Ҳолат юзасидан дастлабки терговолди ҳаракатлари олиб борилмоқда.