Президент юк ва йўловчи ташиш тизимига оид янги қарор имзолади

Ўзбекистон Республикаси президенти «Юк ва йўловчи ташиш тизимини тубдан такомиллаштириш чора-тадбирлари тўғрисида»ги қарорни имзолади.

Ҳужжат билан Транспорт вазирлиги, Ички ишлар вазирлиги, Адлия вазирлиги ва «Ўзстандарт» агентлигининг 2019 йил 1 июлдан эътиборан қуйидагиларни бекор қилиш тўғрисидаги таклифларига розилик берилди:

а) халқаро ташувларда фойдаланиладиган шатакчи автомобилларга лицензия карточкаларини бериш учун давлат божини тўлаш тартиби;

б) қуйидагиларни мажбурий сертификатлаш:
- «Евро-5» ва «Евро-6» экологик синфлари талабларига жавоб берадиган, Европа иттифоқи мамлакатларида ишлаб чиқарилган ҳамда олиб кирилувчи янги юк ва махсус автотранспорт воситаларни, шунингдек, юкларни автомобиль транспортида ташиш учун тиркама ва ярим тиркамаларни;
- транспорт-экспедиторлик хизматларини;

в) йўловчиларни ташиш учун фойдаланиладиган автотранспорт воситаларида назорат-касса аппарати мавжудлиги тўғрисидаги талабни, агар чек берилиши ёки йўловчи сафарини электрон рўйхатга олиш имконияти мавжуд бўлса;

г) малака талабларига мувофиқлик учун аттестациядан ўтиш тўғрисидаги талаб:
- автомобиль транспортида юк ташиш билан шуғулланадиган якка тартибдаги тадбиркорлар;
- корхона штатида автотранспорт воситалари эксплуатацияси ва ташувлар хавфсизлигини таъминлаш учун масъул бўлган мутахассис алоҳида бирлиги мавжуд бўлганда, шунингдек, белгиланган тартибда аттестациядан ўтганда, юридик шахснинг раҳбари;

д) автомобиль транспортида йўловчилар ва юкларни ташиш бўйича фаолиятни амалга ошириш учун лицензия олишда юридик шахслар балансида автотранспорт воситаларининг мавжудлиги тўғрисидаги талаб. “Замин” янгиликларини “Одноклассники”да кузатиб боринг