Банкоматлардан нақд пул ечиб олишда фоиз тўловини чегаралаш таклиф қилинди

“Менинг фикрим” жамоавий мурожаатлар порталида банкоматлар орқали нақд пул олинганда фоиз тўловини чегаралаш ҳақида петиция эълон қилинди.

Таъкидланишича, ҳозирда пластик картадаги пулни нақдлаштириш жараёнида тўлов 1 фоиз этиб белгиланган. Агарда 1 млн. сўм нақд пул нақдлаштирилса, унда 10 минг сўм қўшимча ҳақ олиб қолинади.

“Бошида текин бўлган бу амалиёт айни вақтда 1 фоиз этиб белгиланди. Банк муассасалари буни банкоматга кетадиган харажатлар: интернет, техник таъминот, назорат қилиш каби харажатларни қоплаш учун олинади деб тушунтиришди. Майли, банкнинг ўз харажатлари борлигини тушунган ҳолатда 1 фоизга қаршилик йўқ, лекин қанча кўп пул ечиб олсангиз шунча кўп маблағ йўқотасиз”, - деб ёзади мурожаат муаллифи.

Билдирилишича, агарда 5 млн. сўм нақдлаштирилса, 50 минг, 10 млн. сўм нақдлаштирилса, 100 минг сўм йўқотилади. Қанча кўп нақдлаштирилса, шунча зарарга тушилади. Бу масалани кўриб чиқиш ва аҳолига қулайликлар яратиш керак.

Шу сабабли, қуйидагилар таклиф қилинди:
биринчидан, банкомат орқали 1 млн. сўмдан ортиқ маблағ ечилганда, 10 минг сўмдан (яъни 1 млн.ни 1 фоизи) кўп фоиз ушланмасин;
иккинчидан, агар фойдаланувчи бир ой давомида банкоматдан пул нақдлаштирса, қайси банкоматдан пул нақдлаштирганидан қатъий назар фақат 1 мартагина фоиз ушлансин;
учинчидан, қанча кўп пул ечилса, фоиз тўлови шунча камайиб борсин (1 млн. гача 1 фоиз, 5 млн. гача 0,5 фоиз ва ҳ.к.);
тўртинчидан, банкоматлар ўзлари тегишли бўлган банк пластик карточкаларидан фоиз ушламасин. “Замин” янгиликларини “Facebook”да кузатиб боринг