Йирик бозорлар ёнидаги камералар 5 кунда ярим миллиард сўмдан кўпроқ жарима қайд этди

Бугун, 16 июль куни Тошкент шаҳар Ички ишлар бош бошқармаси мультимедиа марказида навбатдаги брифинг бўлиб ўтди.

Тадбирда маълум қилинишича, пойтахт худудидаги йирик бозор ва савдо мажмуалари атрофида йўл-транспорт ҳодисалари ҳамда тирбандликларнинг олдини олиш бўйича, Хитой Халқ Республикасининг «Хиквижн» компанияси томонидан транспорт воситаларини тўхташ ва тўхтаб туриш қоидабузарликларини қайд этиш функциясига эга 4 дона айланма кузатув видеокамералари «Тошкент савдо маркази», «Чилонзор буюм бозори» ва «Карвон» бозорларига ўрнатилиб, жорий йилнинг 1-9 июль кунлари тест тариқасида синовдан ўтказилган ва бу вақт ичида 8240та қоидабузарлик аниқланган.

Жорий йилнинг 10 июль кунидан бошлаб аниқланган қоидабузарликлар бўйича чиқарилган электрон қарорларни манзилларига етказиш учун КААТ тизими орқали Ўзбекистон почтасига электрон тартибда юборилиши йўлга қўйилган. Жорий йилнинг 10 июль кунидан бугунги кунга қадар жами 864та қоидабузарлик аниқланиб, 525 млн 312 минг сўм жарима белгиланган.

Тадбирда иштирок этган Kun.uz мухбирининг «шу кунга қадар ойналар қорайтириш бўйича нечта қоидабузарлик аниқланди ва уларнинг барчасидан жарималар ундирмоқдами?» деган саволига жавобан Тошкент шаҳар ИИББ ЙҲХХ бошқармаси бошлиғи ўринбосари, подполковник Азиз Садиров жавоб берди.

«Жорий йилнинг ўтган 6 ойи давомида ойналарни рухсатсиз қорайтириш бўйича 1217 ҳолат аниқланган ва барчасига чора кўрилган. Ижтимоий тармоқларда жарима майдончаларида турган автомобилларнинг кўпчилиги айнан мана шу қоидабузарлик билан олиб кирилгани ва жарималар тўланмаётгани тўғрисидаги маълумотлар асоссиз. Барча ҳолатлар бўйича жарималар ундирилиши юзасидан чоралар кўрилмоқда, жазо муқаррарлиги таъминланмоқда», деган у.

Эслатиб ўтамиз, бозор ёқасидаги йўлга «Тўхташ тақиқланган» йўл белгиси талабига бўйсунмаган ҳайдовчиларга автоматик равишда жарима ёзадиган камера ўрнатилиб, 10 июлдан ишга тушган эди. «Замин» янгиликларини «Вконтакти»да кузатиб боринг