11:24 / 25.10.2019
2 492

Мактаблар учун янги миллий таълим стандартлари ишлаб чиқилади

Мактаблар учун янги миллий таълим стандартлари ишлаб чиқилади
Фото: Халқ таълими вазирлиги ахборот хизмати
Халқ таълими вазирлигида БМТнинг Ўзбекистондаги Болалар жамғармаси (ЮНИСЕФ) ҳамда таълим соҳасидаги халқаро экспертлар билан учрашув бўлиб ўтди.

Учрашув доирасида халқ таълими вазири Шерзод Шерматов мамлакатда халқ таълими тизимида кенг кўламли ислоҳотлар бошлангани ва 2030 йилгача мўлжалланган халқ таълими тизимини ривожлантириш концепцияси қабул қилганлигини таъкидлади.

Мамлакатда таълим сифатини ошириш мақсадида 2030 йилгача PISA мезонлари бўйича дунёнинг ўттизта энг илғор мамлакати қаторига кириш мақсад қилиб қўйилган.

Етакчи мамлакатлар тажрибаси шуни кўрсатадики, сифатли таълим стандартларини яратишда йўл харитасининг ишлаб чиқилиши муҳим ҳисобланади.
Миллий таълим стандартлари асосида дарслик ва ўқув қўлланмалар, ўқитиш усули ҳамда баҳолаш тизими яратилади.

Стандартлар таълимни ривожлантиришга, шу билан бирга ўқитувчилар малакасини оширишга қаратилган. Шунингдек, таълим тизимининг юқоридаги барча таркибий қисмларини улашга ва энг яхши натижаларга эришиш учун уларни биргаликда амалга ошириш имконини беради. Миллий стандартлар юқорида қайд этилган элементларнинг ўзаро боғлиқ ҳолда қўйилган мақсадларга эришишга замин яратади.

Халқ таълими вазирлиги томонидан бугунга келиб умумий ўрта таълим миллий стандартининг лойиҳаси тайёрланди. Стандартлар маҳаллий ва хорижлик экспертлар иштирокида яратилди.
Мазкур лойиҳа ва хорижнинг илғор тажрибасини муҳокама этиш учун ЮНИСЕФ эксперти Метю Голди-Скот Ўзбекистонга ташриф буюрди.

Умумий ўрта таълим стандартлари лойиҳалари йил якунига қадар жамоатчилик муҳокамасига қўйилиши режалаштирилган. Кейинги босқичда амалга ошириладиган вазифалар ҳар бир фан ва синф учун ўқув дастурларини ишлаб чиқиш ҳамда 2020 йил ўқув материалларини тайёрлашдан иборат бўлади.

Янги стандартлар асосида ишлаб чиқилган ўқув режалари ва дастурлари мактабларда 2021-2022 йилларда апробациядан ўтади ва келаси беш йилда босқичма босқич жорий этиб борилади.

arenda kvartira tashkent


Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Янгиликлар » Жамият » Мактаблар учун янги миллий таълим стандартлари ишлаб чиқилади