Намангандаги газ-заправкада навбатда турган Damas ёниб кетди

Наманган вилояти Тўрақўрғон тумани «Кумидон» маҳалласи ҳудудида жойлашган «Афсона-4» автомобилларга газ қуйиш шохобчасида 11 январь куни соат тахминан 7:50 да газга навбатда турган Damas ёниб кетди. Бу ҳақда ИИВ Йўл ҳаракати хавфсизлиги бош бошқармаси (ЙҲХББ) хабар бермоқда; ҳодиса видеоси Telegram’да тарқалган.

Дастлабки маълумотларга кўра, 1999 йилда туғилган Б.А. бошқарувида бўлган машинанинг ёниб кетишига двигатель қисмидаги электр симларининг қисқа туташуви сабаб бўлган. Қайд этишларича, ёнғин тезда (бошқа ҳайдовчилар ёрдами билан) бартараф этилган, ҳодиса оқибатида тан жароҳати олганлар йўқ.

«Ҳодиса юзасидан Тўрақўрғон тумани ИИБ ЙҲХБ ва ФВБ томонидан суриштирув ишлари олиб борилиб, содир бўлиш сабабларига аниқлик киритилмоқда», — дея қўшимча қилинган ИИВ ЙҲХББ ахборотида.

Янгиликлар