Ниҳоят! Шомуродов шу жамоани танлади...

Элдор Шомуродовнинг трансферига оид хабарлар тобора кўпайиб бормоқда. Энг қизиғи, бу хабарларнинг айримлари бир-бирига зид келмоқда.

Россиянинг “Спорт Эксперсс” нашри “Болонья” спорт директори Жованни Сарторига таянган ҳолда бу клуб Элдор Шомуродовнинг трансферини сотиб олмаслиги ҳақида хабар тарқатди.

Лекин орадан кўп ўтмай, Италиянинг бир неча нуфузли нашрлари Шомуродов фаолиятини давом эттириш учун айнан “Болонья”ни танлаганини ёзмоқда. Хусусан, Болонья шаҳрининг Corriere Di Bologna газетаси ўзбек ҳужумчиси айнан “Болонья” жамоасига ўтишга жуда яқин келгани ҳақида ахборот тарқатди.

Бу маълумотни Италиянинг энг машҳур газеталаридан бири Corriere dello Sport ҳам тасдиқлади. Нашрнинг таъкидлашича, томонлар Шомуродов трансфери бўйича бир тўхтамга келган. Унга кўра, “Болонья” ўзбекистонлик легионерни кейинчалик сотиб олиш мажбурияти билан бир мавсум ижарага олади.

Мавсум якунланган болоньяликлар Шомуродовни 10 миллион евро эвазига сотиб олиши керак бўлади. Бу трансфер ҳали расман тасдиқлангани йўқ.

“Болонья” Шомуродовни олиш учун энг кўп ҳаракат қилаётган жамоа ҳисобланади. Шунингдек, ҳужумчимизга А Серия вакилларидан “Монца”, “Сассуоло” ва “Торино” жиддий қизиқиш билдирганди. Айрим манбалар туринликлар ва сассуололиклар ҳамон ўзбек ҳужумчисини қўлга киритишдан умидвор эканини ёзмоқда.

Бундан ташқари, Шомуродов хизматларига Англия премьер-лигасининг “Вулверъжмптон” ва Саудия Арабистонининг “Ал-Ҳилол” жамоаларидан чорлов бўлди. Маълумотларда таъкидланишича, ўзбек ҳужумчиси фаолиятини Италияда давом эттиришни маъқул кўрган.

27 ёшли Элдор Шомуродов “Машъал” тарбияланувчиси ҳисобланади. 2014 йили Ўзбекистон чемпионатида муборакликлар сафида ўн марта учрашув ўтказган истеъдодли ҳужумчи келаси мавсумдан “Бунёдкор”га ўтган эди.

Пойтахт жамоасидаги икки уч йиллик фаолияти давомида Элдор 66 та учрашувда рақиблар дарвозасини 18 маротаба ишғол қилди.

Кейинчалик Шомуродов Россия премьер-лигасининг “Ростов” жамоасига кўчиб ўтди. Ушбу жамоа бош мураббийи Валерий Карпин ҳамюртимизнинг истеъдодини сайқаллаб, уни Европа даражасида тўп тепишга қодир ҳужумчига айлантирди. Ростовликлар сафида премьер-лигада жами 80 та учрашувда 16 та, Россия кубоги ва Европа Лигасида биттадан тўп киритган ҳужумчимиз 2020 йилнинг октябрида Италия чемпионатига кўчиб ўтди.

“Женоа” ҳужумчимиз учун “Ростов”га жами 9 миллион евро миқдорида бадал пули тўлади. Кучли бешлик чемпионатларидаги дебют мавсумида Шомуродов саккизта тўп киритди ва бир неча гранд клублар эътиборини тортди.

Охир-оқибат легионеримиз “Рома”ни танлади. Шомуродов Жозе Моуриньо қўл остидаги мавсумни қирқта учрашув, бешта гол ва олтита ассист билан якунлади. Шунингдек, Конференциялар лигасида ғолиб чиқиб, Европадаги илк нуфузли совринини қўлга киритди.

Шомуродов Ўзбекистон миллий терма жамоаси етакчиси ва сардори ҳисобланади. Ҳужумчимиз мамлакатимиз бош жамоасида 56 маротаба майдонга тушиб, ўз ҳисобига 30 та гол ёздириб қўйган. “Замин” янгиликларини “Инстаграм”да кузатиб боринг