Осиё кубоги "B" гуруҳининг иккинчи туридан ўрин олган Сурия ва Австралия (0:1) ўртасидаги учрашувдан сўнг сурияликлар бош мураббийи Эктор Купер матбуот анжуманида қатнашди.
- Ўйин ҳақида қисқача фикрингиз?
- Натижадан хурсанд эмасман. Йигитларнинг ўйинидан эса қониқдим. Рақиб жуда кучли эди. Бизга етмаган нарса бу вазиятлардан фойдаланиш бўлди, аммо ўйинимиздан мамнунман.
- Натижа ёқмагани аниқ, аммо биз фақатгина биргина гол фарқи билан ютқаздик. Кейинги босқичга чиқиш имкониятимиз ҳозирда қандай?
- Икки ўйинда бир дона гол ўтказиш албатта яхши. Учинчи ўринда Ҳиндистонга қарши ўйнаймиз. Бу учрашувда ғалаба қозонишимиз керак. Менга йигитларнинг ўзларига бўлган ишончлари ёқмоқда. Жамоадаги янги ўйинчилар ўйиндан ўйинга очилиб боришмоқда. Ўйлайманки, Ҳиндистонни мағлуб эта оламиз.
- Бугун етишмаган нарса вазиятни якунлаш эканини айтдингиз. Балки, бу Омар Ал Сома ёки шунга ўхшаш ҳужумчининг йўқлиги билан боғлиқдир?
- Бизда кучли ҳужумчи бор. Гап омадда бўлса керак. Агарда вазият ярата олмаганимизда кўпроқ ташвишга тушардим. Биз эса анча вазиятга эга бўлдик ва рақиб ҳимоясини саросимага сола олдик. Жамоанинг ўйинидан тўлиқ қониқдим.
- Бугун ўйин давомида жуда кўп марта асабийлашдингиз. Бунга сабаб нима бўлди?
- Ҳар бир мураббий учун бу нормал реакция ҳисобланади. Футболнинг жозибаси шундан иборат.
- Биринчи бўлимда жамоамиз жуда яхши ўйнаганди, иккинчи таймда эса аксинча. Заҳира ўриндиғида сизда жуда кўп вариантлар бор эди. Нега кўпроқ ўзгаришларга қўл урмадингиз?
- Ўзгаришлар масаласида ҳар бир мураббий ўйинчиларнинг ҳолатига қараб иш тутади. Ҳар бир мутахассиснинг ўз қарашлари бор. Мен шундай қилишни истадим.
- Гуруҳ босқичидаги ўйинларимиздан келиб чиқиб, кейинги ўйинда ғалаба қозонишимизга қанчалик ишоняпсиз?
- Мухлислардан умидни сўндирмасликларини сўрайман. Бугун жуда яхши ҳаракат қилдик. Кейинги ўйинда баъзи ўзгаришларни амалга оширамиз ва ғалаба қозонамиз. Бу Сурия учун тарихий натижа бўлади.
“Замин” янгиликларини “Инстаграм”да кузатиб боринг
