Абдуқодир Ҳусанов “Манчестер Сити”да қачон дебют қилиши мумкин?

Абдуқодир Ҳусанов фаолиятини “Манчестер Сити”да давом эттириши расман эълон қилинди. Ҳозир бу трансфер энг кўп муҳокама қилинаётган долзарб мавзулардан бўлиб турибди.

Бугунги кунда Англия чемпиони 20 ёшли ўзбек ҳимоячиси учун Франциянинг “Ланс” клубига жами 50 миллион евро тўлаши, Абдуқодир “шаҳарликлар” билан 2029 йилнинг ярмигача давом этадиган шартнома тузгани, томонлар ўзаро келишган ҳолда ҳамкорликни яна бир йилга узайтириши мумкинлиги ва ҳамюртимиз янги клубида 45-рақамни танлагани ҳақидаги маълумотлар тарқалиб бўлди.

Ҳозир кўпчиликни қизиқтираётган энг дорзарб масала Абдуқодир Ҳусанов “Манчестер Сити”даги дебютини қачон ўтказиши бўлиб турибди.

“Манчестер Сити”нинг энг яқин учрашуви 22 январь куни Европа Чемпионлар лигаси умумий босқичи доирасида ПСЖга қарши ўтказиладиган сафардаги баҳс бўлиб турибди. Бироқ манбаларнинг маълум қилишича, “шаҳарликлар” янги ўйинчилари – Абдуқодир Ҳусанов ва Витор Рейсни мусобақа қайдномасидан ўтказишга улгурмаган.

Шу боис, ҳар икки легионер Чемпионлар лигасида Хосеп Гвардиола жамоасига ёрдам бера олмайди.

Манчестерликлар энг нуфузли турнирнинг умумий босқичидаги охирги учрашувини 29 январь куни Германияда “Штутгарт”га қарши ўтказади.

Агар Хосеп Гвардиола шогирдлари Чемпионлар лигасининг умумий босқичи якунларига кўра, кучли 24 жамоа қаторидан жой олса, мусобақадаги иштирокини давом эттиради. Сўнгги икки тур олдидан “Манчестер Сити” олтита учрашувда саккиз очко тўплаган ҳолда 22-поғонани эгаллаб турибди.

Англия чемпионлари нимчорак финалга тўғридан тўғри чиқадиган энг кучли саккизта клуб қаторига қўшила олмаслиги ойдинлашиб қолган. Шу боис, манчестерликлар қўшимча тарзда ўтказиладиган ўтиш учрашувлари орқали 1/8 финал йўлланмаси учун курашиши кутиляпти.

Абдуқодир Ҳусанов ва Витор Рейс каби янги ўйинчилар “Манчестер Сити”даги дебют учрашувини Англия Премьер-лигаси доирасида 25 январга белгиланган “Челси”га қарши ўйинда нишонлаши мумкин. Бу баҳсга манчестерликлар мезбонлик қилади.

Эслатиб ўтамиз, “Челси” ҳам ўзбек футболчисига жиддий қизиқиш билдирган эди. Бироқ рақобатчиларга нисбатан дадил ҳаракат қилган “шаҳарликлар”ни трансфер масаласини жуда тез ва бир уринишда ҳал қила олди.

Абдуқодир Ҳусанов “Манчестер Сити” сафида майдонга тушиши билан Англия Премьер-лигасидаги биринчи ўзбек футболчиси сифатида тарихга ўз номини ёздириб қўяди.

Легионеримиз 19 ёшидаёқ Франция футболидаги ягона ўзбекистонлик футболчи сифатида ўчмас из қолдирган. “Замин” янгиликларини “Telegram”да кузатиб боринг