Баҳодир Жалолов Канададаги жанги нега бекор қилинганини айтди (видео)

Ўзбекистонлик боксчи Баҳодир Жалоловнинг бугун, 6 февраль куни бўлиб ўтиши режалаштирилган жанги бекор қилинди. Бу ҳақда боксчининг ўзи ижтимоий тармоқдаги саҳифаси орқали маълум қилди.

Канаданинг Монреаль шаҳрида профессионал бокс оқшоми ташкил этилади. Унда супероғир вазн тоифасида ўзбекистонлик профессионал боксчи Баҳодир Жалолов франциялик Девид Спилмонтга қарши рингга кўтарилиши керак эди. Афсуски, шифокорлар ўзбекистонлик спортчига жанг қилиш учун рухсат бермади.

“Жанг бекор бўлди. Арзимаган учуқ сабаб, жанг бекор қилинди. Рақиб ҳам, мен ҳам жанг қилишни хоҳладик. Афсуски, комиссия рухсат бермади. Бу ҳолат менда ёшликдан мавжуд. Бирор давлатга учсам ёки ҳаво алмаштирсам шунақа бўлади”, дейди икки карра Олимпиада чемпиони Баҳодир Жалолов.

Баҳодир Жалолов шу кунларда АҚШнинг Индио шаҳрида мазкур жанг учун тайёргарлик кўраётган эди.

Маълумот ўрнида, Жалолов профессионал фаолиятида 14 та жанг ўтказган ва барчасида нокаут эвазига ғалаба қозонган. Унинг сўнгги жанги 2023 йилда Тошкентда ўтказилган бокс оқшомида Жанубий Африка вакили Крис Томпсонни биринчи раунднинг ўзида мағлуб этганди. “Замин” янгиликларини “Telegram”да кузатиб боринг