Абдуқодир Ҳусанов “Манчестер Сити”да тобора муҳим фигурага айланмоқда!

Ўзбекистон миллий терма жамоаси ҳимоячиси Абдуқодир Ҳусанов Англияга кўчиб келганидан бери катта эътибор марказида қолмоқда. Англия Премьер-лигасининг амалдаги чемпиони “Манчестер Сити”да жамоа учун муҳим ўрин тутувчи футболчига айланиб бораётгани футбол экспертлари томонидан ҳам эътироф этилмоқда.

Гвардиола ишонч билдирмоқда

Испаниялик мутахассис Хосеп Гвардиола Ҳусановнинг инглиз тилини яхши билмаслигига қарамай, уни майдонга тезда мослаштиришга қарор қилди. У ўзбек ҳимоячисининг ақлий салоҳияти ва ўйинни ҳис қилиш қобилияти юқори эканини таъкидлади:

“Абдуқодир ўйинни жуда яхши тушунади. Биз ундан кўпроқ инглиз тилини ўрганишни талаб қиляпмиз, аммо майдондаги ҳаракатлари орқали у қандай ўйинчи эканини кўрсатиб келмоқда”, – деди Гвардиола.

Шунингдек, Гвардиола футболчининг жамоа учун муҳим фигурага айланиб бораётганини алоҳида эътироф этди:

"Тил борасидаги тўсиқларга қарамай, Абдуқодирнинг салоҳияти юқори. Чунки у ўйинни яхши тушуна олади, ўзи майдонда нима қилиш кераклигини яхши билади.

Ҳусанов ўйинлар орқали ўрганиш жараёнини бошдан ўтказяпти. Абдуқодирда бизда бўлмаган сифатлар бор, жамоага ёрдам бера олишига аминмиз. У ҳимоя марказида, ўнг тарафда, уч ҳимоячили тактикада, хуллас турли позицияларда ўйнай олади, - деди Хосеп Гвардиола.

Абдуқодир Ҳусановнинг тезда жамоага киришиб кетиши

Абдуқодир “Манчестер Сити” сафига қўшилганидан беш кун ўтиб, “Челси”га қарши майдонга тушди. Ушбу ўйинда янги муҳит, кучли рақиблар ва тезкор ўйин услубига мослашишга мажбур бўлди. Ҳимоячи шу пайтга қадар Премьер-лига, Англия кубоги ва Чемпионлар Лигасида ҳаракат қилиб улгурди.

Ўйинлар ва натижалар

Абдуқодир Ҳусановнинг Англиядаги илк тажрибаси қуйидагича бўлди:

• 5 та расмий ўйинда қатнашди.
  
• 4 та учрашувда асосий таркибда майдонга тушди.
  
• 369 дақиқа ўйнади.
  
• Кубок баҳсида биринчи голини урди.
  

Муҳим хулоса

20 ёшли легионеримиз жамоада тобора мустаҳкам ўрин эгаллаб бормоқда. Гвардиола уни ҳимоя марказида, ўнг қанотда ва уч ҳимоячи тактикасининг бир қисми сифатида ишлатмоқда. Бу эса Ҳусановнинг ҳар томонлама ўсиши ва тажрибасини ошириш учун қулай имкониятдир.

Англиядаги фаолиятининг дастлабки босқичиданоқ шиддатли футбол муҳитига мослашаётган Ҳусанов мухлислар ва экспертлар эътиборига тушиб улгурди. “Манчестер Сити” сафидаги фаолияти катта истиқболларга йўл очиши мумкин! “Замин” янгиликларини “Telegram”да кузатиб боринг