Абдуқодир Ҳусанов: Гвардиоланинг ишончини оқлаган ҳимоячи

Англия Премьер-лигасининг 28-туридан ўрин олган “Ноттингем Форест” ва “Манчестер Сити” учрашуви мухлислар учун қизиқарли ва кескин курашларга бой бўлди. Чемпионлик учун курашаётган “шаҳарликлар” ушбу баҳсда ғалаба қозонишга интилишди, аммо майдон эгалари катта куч билан ҳимояланиб, қарши ҳужумлар орқали хавф туғдиришди.

Гвардиола Ҳусановнинг ўйинидан мамнун

Ушбу учрашувда “Манчестер Сити” жамоасининг янги трансферларидан бири – Абдуқодир Ҳусанов илк дақиқалардан майдонга тушди. Жорий мавсумда ажойиб ўйини билан мухлислар ишончини қозонаётган ўзбек ҳимоячиси яна бир бор юқори савиясини намоён қилди. У рақиб ҳужумчилари – Каллум Хадсон-Одои ва Крис Вуднинг самарали ўйин кўрсатишига йўл қўймади.

Учрашувдан кейин “Манчестер Сити” устози Хосеп Гвардиола Ҳусановнинг ўйинини юқори баҳолаб, уни мақтади:

"Биз ҳимоя марказида ҳақиқатан жуда яхши ўйнадик. Ҳозир бошқа марказий ҳимоячиларимиз йўқ. Айниқса, Абдуқодир Ҳусанов зўр ҳаракат қилди, шунингдек, Рубен Диас ҳам. Биз ўз дарвозамиз олдида хавфли вазиятлар кўпайишига йўл қўймадик. Ҳимояланишда футболчиларимиз ўзини кўрсата олди. Беллашув кучли босим остида ўтди."

Ҳусанов – муваффақиятли трансфер

Жорий йилнинг 20 январида “Ланс” клубидан “Манчестер Сити”га кўчиб ўтган Ҳусанов Премьер-лига, Англия кубоги ва Европа Чемпионлар Лигасида жами етти учрашув ўтказди. Унинг фаолиятида битта гол ургани ҳам мухлислар учун кутилмаган ва ёқимли янгилик бўлди.

Мутахассислар Ҳусановнинг “Сити”га келганидан бери жамоа ҳимоя чизиғида сезиларли яхшиланиш кўзга ташланганини таъкидлашмоқда. Айниқса, Гвардиоланинг тажрибали ҳимоячилари – Жон Стоунз, Натан Аке ва Мануэль Аканжи йўқлигида Ҳусанов жамоа учун муҳим ўйинчига айланди.

“Сити”нинг чемпионлик имкониятлари

Ҳозирги натижаларга қарамай, “Манчестер Сити” жорий мавсумда Англия чемпионлигини сақлаб қолиши қийин. "Ливерпуль" ва "Арсенал" жамоалари кучли ўйин намойиш этиб, турнир жадвалида пешқадамлик қилмоқда. Бунга қарамай, “Сити” Англия кубогида ғолиб чиқишни ва мавсумни соврин билан якунлашни мақсад қилган.

Абдуқодир Ҳусанов эса бу йўлда Гвардиоланинг ишончини оқлаб, жамоа учун муҳим фигурага айланиши мумкин. Унинг аниқ паслари, кучли яккакурашлари ва ҳимоядаги қатъияти мухлислар ва мутахассислар томонидан юқори баҳоланмоқда.

Ҳусановнинг “Манчестер Сити”даги фаолияти тез суръатларда ривожланмоқда. У жамоанинг ҳимоя чизиғида муҳим роль ўйнаётгани ва Гвардиоланинг ишончини оқлаётгани Премьер-лига мухлислари орасида катта эътирофга сабаб бўлмоқда. Ўзбек легионери учун эса бу фақатгина бошланиши бўлиши мумкин! “Замин” янгиликларини “Telegram”да кузатиб боринг