Абдуқодир Ҳусановга яхши янгиликлар

Ўзбекистон миллий терма жамоаси марказий ҳимоячиси Абдуқодир Ҳусанов Англиянинг амалдаги чемпиони “Манчестер Сити” таркибида қисқа фурсатда жаҳон даражасидаги юлдузга айланиб бормоқда.

Англия футболини ёритаётган footballfancast.com портали 21 ёшли ўзбек футболчисининг жаҳоннинг энг мураккаб лигасидаги келажаги қандай бўлишини таҳлил қилди.

- Хосеп Гвардиола мавсумнинг биринчи ярмида бир неча ой давом этган инқироздан кейин таркибга янги ижрочилар қўшиш орқали чемпионатнинг иккинчи қисмида жамоани жонлантириш давр талаби эканини тушуниб етди.

Айниқса, Мануэль Аканжи ва Жон Стоунз каби ўйинчиларнинг жароҳатларга мойиллиги янгиланиш ва ўзгаришларни ҳимоя чизиғидан бошлашни тақозо этарди. Январда олиб келинган 18 ёшли Витор Рейс келажакда муҳим ўйинчи бўлиб етишишига шубҳа йўқ.

Айни пайтда эса, “Сити”нинг орқа чизиқдаги муаммоларини жамоага осонликча киришиб кетган Абдуқодир Ҳусанов ҳал этяпти.

21 ёшли Абдуқодир Англия Премьер-лигасида ўйнаётган биринчи ўзбек футболчисига айланганидан фахрланса арзийди. Бу ўйинчи учун “шаҳарликлар” Франциянинг “Ланс” клубига 33,5 миллион фунт тўлади.

Манчестерга келганидан бери ўзбек легионери бош мураббий Хосеп Гвардиола учун энг муҳим трансферлардан бири бўлди. “Манчестер Сити” бу ўйинчини олгунича, у Лига 1 жамоаси учун жами 31 та ўйинда майдонга тушган эди.

Ана шу баҳсларда у ўз сифатини кўрсатиб қўйганди. Хусусан, Франция чемпионати юқори дивизионининг биринчи ярмида ёш ҳимоячи 90 дақиқа ичида тўпни эгаллаб олиш бўйича 2,4 кўрсаткич билан рейтингда биринчи, юқоридан келаётган тўплар учун курашда 2,49 натижа билан 17-ўринда қайд этилган.

“Манчестер Сити” ўйинчисига айланганидан бери Абдуқодир ҳозирча еттита ўйинда иштирок этиб, ҳимоя марказини мустаҳкам ушлаб турибди, бундан ташқари Англия кубоги доирасида “Лейтон Ориент” дарвозасини ишғол қилди, - деб ёзмоқда footballfancast.com портали эксперти Росс Килвингдон.

Журналист Алекс Баркер Абдуқодир Ҳусановнинг ўйинини таҳлил қилиб, 21 ёшли ўйинчининг жисмоний куч-қуввати ҳаммани даҳшатга солаётганини, ўзбек футболчиси Англияда ўз истеъдодини ҳар томонлама намойиш этиб бўлганини алоҳида таъкидлади. Буни статистика ҳам кўрсатиб турибди.

Абдуқодирнинг Премьер-лигадаги бешта учрашувда узатган тўплари аниқлиги 92 фоизни, “иккинчи қават”даги курашлардаги ғалабалари улуши 57 фоизни ташкил қилмоқда. Бу кўрсаткичлар бўйича Абдуқодир “Арсенал” етакчи ҳимоячиси Вильям Салиба (тўп узатиш аниқлиги 94, ҳаводаги яккакурашларда ғолиб чиқиш улуши 61 фоиз) ҳамда “Ливерпуль” юлдузи Виржил ван Дейк (тўп узатиш аниқлиги 92, ҳаводаги яккакурашларда ғолиб чиқиш улуши 71 фоиз) билан тенглашиб қолди.

Экспертлар Абдуқодир Ҳусанов Англиядаги ҳаёти ва фаолиятини жуда тўғри бошлади, жамоа Премьер-лигада бу чемпионатда ғолиблик учун курашмас экан, жамоага янада чуқурроқ мослашиб олиши лозимлигини айтмоқда.

Уларнинг таъкидлашича, Ҳусановни келаси мавсумда буюк ишлар кутмоқда ва 21 ёшли легионер ишга ҳозиргидек ёндашуви туфайли тез орада жаҳон футболидаги энг зўр ҳимоячилардан бирига айланади. “Замин” янгиликларини “Telegram”да кузатиб боринг