Премьер-лига антирекордчиси Ричард Данн Ҳусановга қандай баҳо берди?

Ўзбекистон миллий терма жамоаси марказий ҳимоячиси Абдуқодир Ҳусанов "Ланс"дан "Манчестер Сити"га ўтиш биланоқ жамоанинг асосий таркибида ўз ўрнини топди. Ҳозирда "шаҳарликлар" ҳимоя чизиғини бир неча ўйиндан бери ушлаб турган ва жамоа учун муҳим фигурага айланган Ҳусанов ҳақида Англия футболи экспертлари, оммавий ахборот воситалари ва мураббийлар фикр билдиришда давом этмоқда.

Яқинда Англия Премьер-лигасида узоқ йиллар фаолият юритган машҳур исландиялик ҳимоячи Ричард Данн “Манчестер Сити”нинг январ ойидаги трансферларига муносабат билдирар экан, Абдуқодир Ҳусановнинг имкониятларини алоҳида таъкидлади.

Данн: "Ҳусанов жамоага ёрқин кириб келди"

"Абдуқодир Ҳусановнинг яқинда "Манчестер Сити"га қўшилгани ва жамоа ўйинига таъсир ўтказа бошлаганини ижобий баҳолайман. Одатда, "Сити" ўз сафига янги ўйинчиларни жалб қилганда, уларнинг мослашуви учун муайян вақт талаб этилади. Аммо Ҳусанов жамоага ёрқин тарзда киришиб кетди. Албатта, унинг "Челси"га қарши дебют учрашувининг дастлабки дақиқаларида йўл қўйган хатолари бор эди. Лекин бу ҳолат футболчининг ўзи учун ҳам кутилмаган бўлди. Шундан сўнг у ўзини йирик ўйинчи сифатида намоён этди.

Абдуқодир "Манчестер Сити" учун ажойиб трансфер бўлиб чиқди. Худди шу фикрни Умар Мармушга нисбатан ҳам айтишим мумкин. Мисрлик ҳужумчи ҳимояга қайтишдан қочмайди, шерикларига қулай вазият яратиб бериш учун майдонда фаол ҳаракат қилади ва ўзи ҳам гол уришга қодир. Айни пайтда Абдуқодир Ҳусанов ҳам, Умар Мармуш ҳам жуда яхши ўйнаяпти. Жамоада уларнинг даражасига чиқа оладиган кўпроқ футболчилар бўлиши мақсадга мувофиқ.

Январда жамоага келганлардан яна бири Нико Гонсалес. Аммо мен уни супер иқтидор эгаси эмас, балки барқарор ўйин кўрсатадиган ярим ҳимоячи сифатида баҳолайман. Жамоада ҳали ҳам кучайтириш керак бўлган нуқталар бор. Аслида бу ишлар ёзда амалга оширилиши режалаштирилган эди, аммо вазият туфайли клуб янги таркибни шакллантиришни январдан бошлади. Кутилмоқдаки, "Манчестер Сити" мавсум якунланганидан кейин ҳам ўз сафини кучайтиришда давом этади." – дейди Ричард Данн.

Ричард Данн – Премьер-лиганинг антирекордчиси

Асли ирландиялик бўлган Ричард Данн қарийб йигирма йиллик профессионал фаолиятини Англия Премьер-лигасида ўтказган. У дастлаб "Эвертон" жамоасида тўрт мавсум ўйнаган, 2000 йили эса "Манчестер Сити"га кўчиб ўтиб, жамоа сафида тўққиз йил ўйнаган ва ҳатто сардорлик қилган. Кейинчалик у "Астон Вилла" ва "Куинз Парк Рейнжерс" клубларида тўп суриб, 2015 йили бутсаларини михга илишга қарор қилди.

Қизиғи шундаки, Ричард Данн Премьер-лига тарихида икки антирекорд билан машҳур:

2009 йили "Уиган Атлетик"га қарши баҳсда ўз фаолиятидаги саккизинчи қизил карточкани олган ва Патрик Виейра ҳамда Данкан Фергюсон билан бирга бу кўрсаткич бўйича рекордни такрорлаган.

У Премьер-лига тарихида ўз дарвозасига энг кўп – ўнта автогол урган ягона футболчи ҳисобланади.

Абдуқодир Ҳусанов "Манчестер Сити" учун жуда муваффақиятли трансфер бўлиб, жамоа ҳимоясида муҳим ўрин тутаётганини кўрсатмоқда. Англия футболида катта тажрибага эга бўлган мутахассислар, жумладан, Ричард Данн ҳам унинг ёрқин келажаги борлигини таъкидламоқда. Январда жамоага қўшилган футболчилардан Ҳусанов ва Мармуш ўзларини муваффақиятли кўрсатаётган бўлса, клуб ёзги трансфер ойнасида янада кучли таркиб яратишни мақсад қилган. Бу эса "Манчестер Сити" мухлислари учун қизиқарли даврлардан бири бўлиши мумкин. “Замин” янгиликларини “Telegram”да кузатиб боринг