
Қозоғистон Премьер-лигасининг жорий мавсумида Туркистон вилояти шарафини ҳимоя қилаётган “Турон” жамоаси ўзбекистонлик футбол мухлисларининг диққат марказида. Бу ҳолатга сабаб ҳам аниқ – жамоа сафида тўрт нафар ўзбекистонлик футболчи: Шаҳбоз Умаров, Одилбек Абдумажидов, Хуршид Мухторов ва ёш ҳужумчи Беҳруз Асқаров мунтазам ҳаракат қилмоқда.
Мавсумни Шаҳбоз Умаровнинг гол ва ассисти билан ғалаба (2:0) билан бошлаган “Турон”, кейинги икки беллашувда “Актобе” ва амалдаги чемпион “Қайрат”га қарши ўйинларда 1:2 ҳисобида мағлубиятга учради.
Тўртинчи турда “Қизил-Жар” меҳмони бўлган Туркистон жамоаси учун ўйин муваффақиятсиз бошланди – мезбонлар 36-дақиқада ҳисобни очди. Бироқ тўрт дақиқа ўтиб, Шаҳбоз Умаров жамоадошини идеал позицияга чиқариб, Игорь Стасевичга гол уриш имконини яратди. Ушбу имконият қўлдан берилинмади ва ҳисоб 1:1 кўринишига келди.
Бироқ “Қизил-Жар” жавоб ҳужуми билан танаффусгача яна бир гол уриб, ҳисобда олдинга чиқиб олди.
Иккинчи бўлимда "Турон" мураббийлари ўйинга ўзгариш киритиш мақсадида 57-дақиқада 22 ёшли ўзбекистонлик ҳужумчи Беҳруз Асқаровни майдонга туширишди. Унинг майдонга тушиши ҳал қилувчи омилга айланди.
Асқаров ўйинга қўшилганидан кейинги ўн дақиқада боши билан жозибали гол уриб, ҳисобни яна тенглаштирди. Бу Беҳрузнинг Қозоғистон чемпионатидаги дебют голи бўлди. У шу билан кифояланмай, жамоа ҳужумларида фаол иштирок этди ва ўйин охирида Лука Загурскийни голли вазиятга чиқариб берди. Россиялик ҳужумчи бу имкониятни қўлдан чиқармади ва “Турон”нинг ғалабали голига муаллифлик қилди — 3:2!
Шу куни “Турон” сафидаги барча ўзбек легионерлари – Шаҳбоз Умаров, Одилбек Абдумажидов ва Хуршид Мухторов тўлиқ ҳаракат қилди.
Ушбу ғалабадан сўнг “Турон” жамғарган очколар сонини 6 тага етказди ва чемпионатда юқори поғоналар сари ҳаракатни бошлади.
Энди туркистонликлар бешинчи тур доирасида 19 апрель куни ўз майдонида Қозоғистоннинг топ жамоаларидан бири – “Астана”ни қабул қилади. Кўзлар яна ўзбек футболчиларининг ҳаракатларида бўлади. “Замин” янгиликларини “Telegram”да кузатиб боринг
Ctrl
Enter
Хато топдИнгизми
Иборани ажратиб Ctrl+Enter тугмасини босингМавзуга оид янгиликлар