АПЛда Чемпионлар Лигасига йўлланма қайси клубларга насиб этади?

Футбол бўйича статистик таҳлиллар ўтказувчи Opta портали Англия Премьер Лигасининг жорий мавсуми якунларига оид янги тахминларини эълон қилди. Унда мавсум якунида кучли бешликка кириб, Чемпионлар Лигаси йўлланмасини қўлга киритиш эҳтимоли энг юқори бўлган клублар кўрсатиб берилган.

Ҳозирча “Ливерпуль” ва “Арсенал” рақибларидан сезиларли даражада олдинда эканлиги сабабли, бу гал асосий эътибор кучли бешлик учун курашаётган бошқа беш жамоага қаратилган.

Таҳлил натижаларига кўра, сўнгги 6 ўйинда мағлубиятсиз серияда давом этаётган “Манчестер Сити” Чемпионлар Лигасига чиқиш учун энг катта имкониятга эга — 95,1%. Нашр фикрига кўра, “шаҳарликлар” мавсумни учинчи ўринда якунлайди.

Тўртинчи поғона учун энг катта эҳтимол “Ноттингем Форест”га берилган — 80,1%. Бешинчи ўринни эса 77,6% эҳтимол билан “Ньюкасл” эгаллаши тахмин қилинмоқда.

Лондоннинг “Челси”си ва “Астон Вилла”нинг имкониятлари нисбатан паст. Хусусан, Маурисио Почеттино бошқарувидаги “кўклар”нинг эҳтимоли 29,7%, Унаи Эмери бошчилигидаги “Астон Вилла”ники эса 17,3% ни ташкил қилган.

Айни вақтда Англия Премьер Лигасида кучли еттилик қуйидагича жойлашган:

1. “Ливерпуль” — 79 очко (33 ўйин)
2. “Арсенал” — 67 очко (34 ўйин)
3. “Манчестер Сити” — 61 очко (34 ўйин)
4. “Ноттингем Форест” — 60 очко (33 ўйин)
5. “Ньюкасл” — 59 очко (33 ўйин)
6. “Челси” — 57 очко (33 ўйин)
7. “Астон Вилла” — 57 очко (34 ўйин)

Эслатиб ўтамиз, 2025/26 йилги мавсумда Англия Премьер Лигасидан Чемпионлар Лигасида 5 жамоа иштирок этади. Шу боис бу мавсумда кучли бешлик учун кураш ҳар қачонгидан ҳам қизғин тус олган. «Замин»ни Telegram’да ўқинг!