Гвардиола «Ливерпуль»нинг чемпионлиги ҳақида: «Улар бу ғалабага тўлиқ лойиқ эди»

Англия Премьер-лигасининг 34-турида «Ливерпуль» ўз уйида «Тоттенхэм» клубини йирик ҳисобда – 5:1 ҳисобида мағлуб этиб, муддатидан аввал мамлакат чемпионлигига сазовор бўлди. Бу натижа орқали кетма-кет тўрт йил чемпион бўлган «Манчестер Сити» бу гал чемпионликни «мерсисайдликлар»га топширишга мажбур бўлди.

«Шаҳарликлар» бош мураббийи Хосеп Гвардиола ҳам рақибнинг чемпионлигига бефарқ қолмади ва ўз табригини билдирди.

«Ўзимнинг ҳамда клубимиздаги ҳар бир ходимнинг номидан «Ливерпуль»ни Англия чемпионлиги билан самимий қутлайман. Улар жорий мавсумда ажойиб ўйин намойиш этди ва бу ғалабага тўлиқ лойиқ эди. Ҳеч қандай шубҳа йўқки, улар чемпион бўлишга муносиб тарзда ҳаракат қилди ва бу мақсадга эришди», – деди Гвардиола.

Шу билан бирга, испаниялик мутахассис келаси мавсумда «Манчестер Сити» янада кучлироқ қайтиб, чемпионлик учун охирига қадар кураш олиб боришини таъкидлади:

«Келгуси мавсумда янада яхшироқ ўйин кўрсатиб, ғалаба учун курашни чемпионатнинг сўнгги туригача давом эттиришни хоҳлаймиз. Лекин ҳозир энг муҳими, чемпион бўлган жамоани табриклашимиз керак. Бугун уларнинг байрами ва буни ҳурмат қилиш зарур», – дея сўзларини якунлади Хосеп Гвардиола.

Эслатиб ўтамиз, «Ливерпуль» ушбу чемпионлик орқали ўз тарихидаги 20-чемпионликка эришди ва бу борада «Манчестер Юнайтед» билан тенглашиб олди. Бу чемпионлик жамоа учун узоқ кутилган ва қувончли воқелик бўлди. «Замин»ни Telegram’да ўқинг!