«Рома» устози Элдор Шомуродовни мақтаб: «У тилла йигит!» деб атади

Италиянинг машҳур клуби «Рома» бош мураббийи Клаудио Ранери А Сериянинг навбатдаги турида «Фиорентина»га қарши кечадиган муҳим ўйин олдидан ташкил этилган матбуот анжуманида иштирок этди. Мазкур тадбирда италиялик тажрибали мутахассис Ўзбекистон миллий терма жамоаси ҳужумчиси Элдор Шомуродов ҳақида ҳам алоҳида тўхталиб ўтди, деб хабар беради Roma Press нашри.

Ранери ўзбекистонлик ҳужумчи ҳақида сўзлар экан, унинг ўйин майдондаги ҳаракатларини юқори баҳолаб, қуйидаги илиқ фикрларни билдирди:

«Эртанги беллашувда Шомуродовнинг Довбик билан бирга асосий таркибда майдонга тушиши эҳтимоли жуда юқори. Элдор биз учун муҳим ўйинчи. У ҳар бир баҳсда ўзини тўлиқ ва аниқ мақсад билан ишга солади. Ўйин давомида кўп марта оғир босимларни енгиб ўтган, лекин ҳеч қачон ўз йўлидан ортга чекинмаганини кўрганман. Ундаги мана шу кучли характер менга ёқади. Элдор – тилла йигит», – деб таъкидлади мутахассис.

Эслатиб ўтиш жоизки, Элдор Шомуродов шу мавсум «Рома» либосида умумий 33 та учрашувда майдонга тушиб, жамоаси учун 7 та гол уришга муваффақ бўлди ва яна 4 та голли пас бериш билан ажралиб турди. Айни пайтда ўзбекистонлик ҳужумчи жамоасининг етакчиларидан бири сифатида мухлислар ва мураббийларнинг ҳурматини қозонган.

Қайд этиш лозим, бундан аввал Элдор Шомуродов «Рома» мухлислари томонидан апрель ойининг энг яхши футболчиси деб топилган ва унинг жамоадаги ўрни яна бир бор эътироф этилган эди.

Эслатиб ўтамиз, «Рома» ва «Фиорентина» ўртасидаги қизғин ўйин 4 май куни бўлиб ўтади. Мазкур баҳс Тошкент вақти билан соат 21:00 да старт олади. Мазкур учрашув Элдор ва унинг жамоадошлари учун чемпионатдаги ўрнини янада яхшилаш йўлида жуда муҳим ҳисобланади.