Артем Довбик Элдор Шомуродов ҳақида: «У нафақат шеригим, балки ҳақиқий дўстимдир»

Италиянинг А Сериясида “Рома” жамоаси сафида тўп сураётган украиналик ҳужумчи Артем Довбик ўзининг ижтимоий тармоқдаги саҳифасида жамоадоши, ўзбекистонлик футболчи Элдор Шомуродов ҳақида илиқ фикр билдирди.

Жорий мавсумда тез-тез бирга майдонга тушиб, ўзаро яхши ҳамкорлик кўрсатаётган бу икки футболчи орасидаги муносабат майдон ташқарисида ҳам жуда яхши экани маълум бўлди. Довбик ўз саҳифасида «Шомуродов – бу менинг ҳақиқий дўстим», деб ёзиб қолдирди.

Бу қисқа ва самимий гап сўнгги турдаги воқеалардан кейин айтилгани эътиборга лойиқ. “Рома” А Сериянинг охирги турида “Фиорентина”га қарши кечган қийин баҳсда майдонга тушган ва ўша учрашувда жамоанинг ягона голини айнан Артем Довбик киритган эди. Бу голга ассист эса ўзбекистонлик ҳужумчи Элдор Шомуродовдан келганди.

Ушбу воқеа мухлислар томонидан катта қизиқиш билан кутиб олинган бўлиб, бу икки ҳужумчининг майдондаги ажойиб шериклиги кўпчиликнинг эътиборини тортди.

Маълумотларга кўра, бу мавсумда Артем Довбик “Рома” сафида барча мусобақалар доирасида жами 44 та ўйинда иштирок этиб, 17 та гол ва 4 та ассистга муаллифлик қилган. Унинг ажойиб ҳужумкор ҳаракатлари клубнинг асосий ўйинчиларидан бирига айланишига олиб келди.

Шунингдек, Элдор Шомуродов ҳам бу мавсумда ўзининг яхшигина кўрсаткичлари билан клубга ёрдам бериб келмоқда. Ўзбекистонлик футболчи мавсум давомида 34 ўйинда майдонга тушиб, рақиб дарвозасига 7 бор тўп киритган ва 5 та голли узатмани амалга оширган.

Шомуродов ва Довбикнинг бир-бири билан жуда яхши тушуниши жамоа бош мураббийи Клаудио Раньерининг ҳам диққат марказида бўлиб турибди.

Римлик мухлислар ҳам бу ҳужумчиларнинг майдондаги биргаликдаги ҳаракатларидан мамнун бўлиб, келажакда уларнинг биргаликда янада кўп голларга ҳисса қўшишини сабрсизлик билан кутишмоқда.

Ҳар ҳолда, Довбикнинг Элдор ҳақидаги самимий фикрлари бу икки футболчининг майдондаги шериклигидан ташқари, дўстлик ришталари ҳам жуда мустаҳкам эканини кўрсатади. Бу эса “Рома”нинг келгуси муваффақиятлари учун муҳим омил бўлиши мумкин. «Замин»ни Telegram’да ўқинг!