Ўзбекистон оғир атлетикачилари Жаҳон чемпионатидан 17 та медаль билан қайтмоқда

Перунинг пойтахти Лима шаҳрида оғир атлетика бўйича ўсмирлар ва ёшлар ўртасидаги нуфузли Жаҳон чемпионати якунланди. Ушбу халқаро мусобақада иштирок этган Ўзбекистон терма жамоаси спортчилари муносиб натижалар қайд этиб, медаллар жамғариш бўйича юқори кўрсаткичларга эришди.

Мусобақанинг якуний кунида майдонга тушган ҳамюртимиз Қудратбек Салимжонов ёшлар ўртасида -109 кг вазн тоифасида куч синашиб, даст кўтариш машқида бронза медалини қўлга киритди. Бу ҳақда Миллий Олимпия Қўмитаси матбуот хизмати расмий хабар бермоқда.

Қудратбек Салимжоновнинг медали жамоамиз учун ушбу чемпионатдаги 17-медаль бўлди. Умумий ҳисобда спортчиларимиз мусобақани 3 та олтин, 7 та кумуш ва 7 та бронза медали билан якунлади.

Ўзбекистон терма жамоаси вакилларининг индивидуал натижаларига келадиган бўлсак, мусобақанинг энг ёрқин иштирокчиларидан бири Моҳинур Эсонбоева бўлди. У икки олтин ва бир бронза медали билан жамоамизнинг умумий натижасига катта ҳисса қўшди. Алишер Османов эса 1 та олтин ва 2 та кумуш медалини қўлга киритиб, Ўзбекистон шарафини муносиб ҳимоя қилди.

Шунингдек, Маржона Абдумуталова ҳам мусобақани юқори савияда ўтказиб, 2 та кумуш ва 1 та бронза медалини қўлга киритди. Мунисбек Давлетов эса икки марта кумуш медалга эга бўлиб, ўзининг юқори маҳорат ва истеъдодини намойиш этди.

Диёрбек Рўзметов чемпионат давомида битта кумуш ва иккита бронза медали билан тақдирланди. Шу билан бирга, Хикматилло Хайдаров, Дилнура Холдорова ва юқорида тилга олинган Қудратбек Салимжонов бир марталик бронза медалларини ўз ҳисобига ёздириб қўйди.

Умуман олганда, Ўзбекистон терма жамоасининг Жаҳон чемпионатидаги иштироки юқори савияда бўлди ва спортчиларимиз томонидан қўлга киритилган медаллар сони терма жамоамизда ёш авлоднинг иқтидори қанчалик юқори эканлигини яна бир бор кўрсатди.

Энди спортчиларимиз келгуси мусобақаларда ҳам шу каби юқори натижаларни қайд этиш мақсадида тайёргарликларни давом эттиради ва янада кўп медаллар билан мухлисларни хурсанд қилишга ҳаракат қилади. Уларнинг навбатдаги мақсади катталар ўртасидаги мусобақаларда ҳам жаҳон аренасида кучли рақибларга муносиб қаршилик кўрсатиб, юртимиз шарафини юқори чўққиларга кўтаришдан иборат. «Замин»ни Telegram’да ўқинг!