Кевин Де Брюйне "Сити"дан кетмаслиги мумкин: барча қарор энди клуб раҳбарияти қўлида

"Манчестер Сити"нинг тажрибали етакчиси Кевин Де Брюйне клубда қолиши мумкин. 33 ёшли бельгиялик плеймейкернинг янги мавсумда ҳам "шаҳарликлар" сафида тўп суриш эҳтимоли яна кучайди. Бу ҳақда англиялик журналистлар тарқатаётган хабарларда қайд этилмоқда.

Маълумотларга кўра, Кевин клуб раҳбариятига ва бош мураббий Хосеп Гвардиолага аниқ билдирган: агар унинг келажаги ҳақидаги фикрлар қайта кўриб чиқилса, у "Сити" билан янги шартнома имзолашга тайёр. Бу ҳолат футболчининг клубга содиқлиги ва ғалабаларга чанқоқлигини яна бир бор кўрсатади.

Эслатиб ўтамиз, Де Брюйнеда ҳозирги шартнома келаётган ёзда ўз якунига етади. Шу сабаб, клуб футболчининг келажаги борасида ўйлашни бошлаб юборган, ҳатто унинг кетиши мумкинлиги ҳақидаги маълумотлар ҳам тарқалган эди. Бу хабарлар Кевинга катта таъсир ўтказди, ва ҳатто у бир муддат клубдан кетишини маълум қилганди.

Бироқ футболчида ҳали ҳам юқори савияда ўйнашга ишонч бор. У, агар имконият берилса, жамоанинг Англия Премьер-лигасидаги чемпионлик унвонини қайтариб олишида ҳал қилувчи шахсга айланиши мумкинлигини таъкидлаган.

Де Брюйне "Манчестер Сити" сафида 2015 йилдан буён тўп суриб келмоқда. Бу давр мобайнида у жамоа билан бир қатор йирик совринларни қўлга киритди ва жамоанинг асосий кучларидан бирига айланди. Унинг майдондаги виждонли ва аниқ ўйини клуб тарихида алоҳида ўрин эгаллайди.

Энди барча эътибор клуб раҳбариятига қаратилган. Уларнинг қароридан келажакдаги муҳим трансфер жараёнлари ҳам, жамоа ички муҳити ҳам боғлиқ. Агар Де Брюйне билан шартнома узайтирилса, бу "Сити" учун яна бир тажрибали йўлбошчининг сақланиши бўлади.

Сиз нима деб ўйлайсиз: Кевин Де Брюйне яна неча йил "Сити" сафида порлайди? «Замин»ни Telegram’да ўқинг!