Манчестер клубида катта таркибий ўзгариш: кимлар жамоани тарк этмоқда?

Англиянинг машҳур клуби “Манчестер Юнайтед” 2024/25 йилги мавсумдаги қониқарсиз натижалардан сўнг таркибий ўзгаришларни бошлади. Клуб расман эълон қилган баёнотга кўра, жамоанинг тажрибали футболчилари — Виктор Линделёф, Жонни Эванс ва Кристиан Эриксен 30 июндан бошлаб “Олд Траффорд” билан хайрлашишади.

Қарорга кўра, ушбу футболчиларнинг шартномалари якунланиши муносабати билан уларга янги битим таклиф қилинмайди. Бу қарор жамоада янги босқич бошланиши ва таркибда янгиланиш жараёни бошланганидан далолат беради.

Виктор Линделёф
2017 йилда Португалиянинг “Бенфика” клубидан таклиф қилинган швециялик марказий ҳимоячи “Юнайтед” сафида 284 та расмий учрашувда иштирок этган. Унинг барқарор ва эҳтиётли ўйин услуби бир неча мураббийлар даврида муҳим роль ўйнаган эди. Аммо сўнгги мавсумларда у асосий таркибдаги ўрнини йўқотганди.

Жонни Эванс
Клуб тарихида икки марта жамоа шарафини ҳимоя қилган футболчи сифатида қайд этиладиган Жонни Эванс "Юнайтед" сафида 241 та учрашувда майдонга тушди. Тажрибали ҳимоячи иккинчи бор клуб билан хайрлашмоқда.

Кристиан Эриксен
Даниялик ярим ҳимоячи “Манчестер Юнайтед”даги фаолияти давомида 108 та ўйинда иштирок этиб, 8 та гол ва 18 та ассистга муаллифлик қилди. Унинг назоратга олинган паслари ва ўйин темпига таъсири бир неча муҳим баҳсларда ҳал қилувчи аҳамият касб этган.

Мухлислар учун бу хабар эҳтимол кутилмаган бўлиши мумкин, бироқ клубнинг ички сиёсатидаги янгиланиш жараёни аниқ кўзга ташланмоқда. Бу футболчиларнинг кетиши жамоада янги ёшлар учун имконият эшигини очиши ва ёздаги трансфер ойнасида катта ҳаракатлар кутилётганидан дарак бериши мумкин.

“Қизил иблислар” учун бу фақат хайрлашиш эмас, балки янги босқичга йўл очишдир.