Бруну Фернандеш “Ал-Ҳилол”дан таклиф олди — жавоб кутилаяпти!

Европа футболида порлаган юлдузлар Саудия Арабистони чемпионатига йўл олаётгани янгилик эмас. Энди эса навбат “Манчестер Юнайтед”нинг ўйинларни бошқарувчи етакчиси Бруну Фернандешга етиб келган кўринади. Таниқли журналист Бен Жейкобс тарқатган маълумотларга кўра, португалиялик футболчи Саудиянинг энг нуфузли клубларидан бири — “Ал-Ҳилол”нинг жиддий эътиборида.

Манбаларга кўра, Фернандешнинг агенти Мигел Пиню шу ҳафтанинг бошида Риёдга бориб, “Ал-Ҳилол” раҳбарлари, жумладан клуб президенти Фаҳад бин Нафал билан музокаралар ўтказган. Учрашув давомида томонлар футболчининг трансфери бўйича дастлабки келишувга эришишган.

“Ал-Ҳилол” Жаҳон клублар чемпионати бошланишидан аввал юлдуз футболчиларни жамоасига жалб қилишни мақсад қилган. Шу сабабли, улар Бруну Фернандешдан жавобни узоғи билан пайшанбагача беришини сўрашган. Сўнгги 48 соат ичида клуб вакиллари трансферни амалга ошириш бўйича фаол ҳаракатларни бошлаган.

Айни пайтда “Ал-Ҳилол” манбалари Бруну Фернандеш бу таклифни рад этмаганини маълум қилган. Бу эса футболчи ушбу янги чақириқни жиддий қабул қилаётганини кўрсатади. Аммо “Манчестер Юнайтед” раҳбарияти ушбу вазиятда ўз сардорини қўлдан чиқаришни мутлақо истамаяпти ва футболчининг кетишига рози эмас.

Бруну Фернандеш жорий мавсум Англия Премьер-лигасида 36 та учрашувда майдонга тушиб, жамоасига 6 та гол ва 10 та аниқ голли узатма билан ёрдам берди. Унинг фаолияти “Юнайтед” учун нафақат статистика жиҳатидан, балки тактик ва руҳий жиҳатдан ҳам алоҳида аҳамиятга эга.

Фернандешнинг “Юнайтед” билан амалдаги шартномаси 2027 йилнинг ёзигача амал қилади. Мутассаддиларнинг баҳолашича, Transfermarkt порталида унинг трансфер қиймати 55 миллион евро атрофида баҳоланмоқда. Бу сумма “Ал-Ҳилол” учун тўсиқ бўлмаслиги мумкин — чунки клуб трансфер бозорида йирик сармоялар билан фаол ҳаракат қилмоқда.

Энди эса барча диққат Бруну Фернандешнинг шахсий қарорида. У келгуси фаолиятини Европа футболида давом эттирадими ёки Саудия лигасида янги саҳифа очадими — буни яқин кунлар кўрсатади.

Zamin.uz таҳририяти Фернандешнинг қарорини сабрсизлик билан кутаётган миллионлаб футбол ишқибозлари қаторида. Батафсил янгиликлар ва расмий маълумотлар эса бизнинг сайтимизда!