Карлсен шахматдан чарчади: классик ўйиндан воз кечиши мумкин

Шахмат оламида жонли тарзда шов-шувларга сабаб бўлаётган воқеалардан бири — Магнус Карлсеннинг "Norway Chess" турниридаги сўнгги баёноти. 6-турда Гукешга қарши мағлуб бўлганидан сўнг, норвегиялик гроссмейстер шахматдаги келажаги ҳақида жиддий мулоҳазалар билан ўртоқлашди.

"Турнир давомида ўзимни ёмон ҳис қилмаяпман, аммо эндиликда ўйин менга завқ бермаяпти. Одатда шахмат менга ижобий кайфият бағишларди, аммо энди ўйин пайтида ўзимни ўтмишдаги ноқулай позицияларга тушиб қолгандек ҳис қиляпман. Ҳаммаси секин кечаяпти, бу мен учун қизиқарли эмас. Ҳа, яхши ўйнашим мумкин, аммо бунинг ўзи етарли эмас. Охирида психологик чарчоқни ҳис қилиб, таслим бўлдим", — деди Карлсен ТВ2 телеканалига берган интервьюсида.

Шу билан бирга, Магнус ўз сўзларида шахматни бутунлай тарк этиш ёки ҳеч бўлмаганда классик форматдан воз кечиш ҳақида ўйлаяпганини очиқ айтди. Унинг фикрича, бундай стрессли ҳолатларни яна бошдан кечиришни хоҳламайди.

Мамлакатда хавотир кучайди

Танқидий баёнотлар нафақат мухлислар, балки экспертлар орасида ҳам жиддий муҳокамага сабаб бўлди. ТВ2 шахмат таҳлилчиси Ён Людвиг Хаммер бу фикрларни "жуда ташвишли" деб атади:

"Магнус агар классик шахматни энди ўйнамоқчи эмаслигини айтса, 2026 йилда Норвегияда классик форматдаги мусобақа бўлишига ишончим кам. Балки вақт формати Карлсеннинг эҳтиёжларига мослаштирилади", — деди у.

Америкалик гроссмейстер Хикару Накамура эса бу вазиятга кўнгилсизлик билан муносабат билдирди:

"Бу хабардан хафаман. Магнус билан ўйнаганимиз сўнгги классик партия бўлиши эҳтимоли 25 фоиздан юқори. Бу шахсий жиҳатдан мен учун ачинарли ҳолат", — деди Накамура.

Карлсен — шахматнинг юзи

Магнус Карлсен нафақат бир неча карра жаҳон чемпиони, балки бутун дунё бўйлаб шахмат юзига айланган шахс ҳисобланади. Унинг шахматга бўлган муносабати ва шахсий фикрлари турнирлар тақдирига, ҳаттоки форматлар шаклига ҳам таъсир кўрсатиши мумкин.

Хулоса қилиб айтганда, Карлсеннинг бу баёноти шахмат жамоасида кучли таъсир уйғотди. Унинг келажакда қандай қарор қабул қилиши — бутун шахмат оламини қизиқтирган асосий саволлардан бирига айланди.