Тарихий зафар: ФИФА президенти Шавкат Мирзиёевни самимий табриклади

Футбол ассоциациялари халқаро федерацияси (ФИФА) президенти Жанни Инфантино Ўзбекистон Республикаси Президенти Шавкат Мирзиёевга самимий ва ҳурматли табрик мактубини йўллади. Ушбу табрик Ўзбекистон миллий терма жамоасининг тарихида илк бор Жаҳон чемпионатига йўлланма олгани муносабати билан эълон қилинди.

Жанни Инфантино ўз мактубида Ўзбекистон терма жамоасининг кеча Осиё минтақасида биринчи бўлиб 2026 йилда АҚШ, Канада ва Мексикада бўлиб ўтадиган ФИФА Жаҳон чемпионати йўлланмасини қўлга киритганлигини алоҳида эътироф этди.

ФИФА президенти ўз мактубида қуйидаги сўзларни ёзган:

“Жаноби Олийлари, ҳурматли Президент! Кеча Ўзбекистон футболи ўзининг бой тарихида илк бор ФИФА Жаҳон чемпионатида иштирок этиш ҳуқуқини қўлга киритди. Ушбу зафар билан Ўзбекистон Осиёдаги энг биринчи жамоалардан бири бўлиб, жаҳон майдонида ўз ўрнини эгаллаш учун муносиб йўлланмага эга бўлди.

Ушбу ажойиб ва мислсиз натижа билан бутун футбол дунёси номидан Сизни шахсан ҳамда барча ўзбекистонлик мухлисларни қалбимдан самимий табриклайман. Терма жамоангизнинг бу муваффақияти фақатгина футболчиларнинг эмас, балки ҳукуматингиз, Ўзбекистон футбол ассоциацияси, терма жамоа бош мураббийи, клублар раҳбарияти, ишчи-ходимлар ва албатта ҳар бир ўйинда ўз севимли жамоасига катта иштиёқ билан қўллаб-қувватлаган миллионлаб мухлисларнинг бирдамлиги ва ҳаракатлари натижаси эканини алоҳида таъкидлайман.

Бу тарихий ғалабанинг қўлга киритилиши бутун Ўзбекистондаги футбол тараққиёти учун ҳам, келажак авлодларнинг футболга бўлган қизиқиши ва ишончи ошиши учун ҳам ниҳоятда муҳим аҳамият касб этади. Ушбу зафарни қўлга киритиш учун Ўзбекистон миллий жамоаси кўплаб босқичларда, оғир ва кескин рақобатларда жаҳон чемпионатига бориш ҳуқуқини қўлга киритишга сазовор эканини исботлади. Бу муваффақият мамлакат футболида янги бир давр очилишидан далолат беради.

Сизнинг раҳбарлигингиз остида Ўзбекистон футболи нафақат Осиё, балки халқаро миқёсда ҳам сезиларли даражада ривожланиб, дунё футболининг ажралмас бир қисмига айланиб бораётгани бизни қувонтирмоқда. ФИФА ҳамиша Ўзбекистоннинг футбол соҳасидаги саъй-ҳаракатларини қўллаб-қувватлашга тайёрдир.

Ҳурматли Президент, яна бир бор Сиз ва бутун ўзбек халқига 2026 йилги Жаҳон чемпионатида улуғвор натижалар тилайман. Бу йирик халқаро мусобақада Ўзбекистон терма жамоаси муносиб ўрин эгаллашига тилакдошман. Шунингдек, Жаноби Олийлари, Сиз билан яна бир бор учрашиш имконияти пайдо бўлишини чин дилдан орзиқиб кутаман”.

ФИФА раҳбарининг мазкур табриги бутун Ўзбекистон халқи учун яна бир бор ғурур ва мамнуният манбаи бўлди.

Ўзбекистон миллий жамоаси 5 июн куни Жаҳон чемпионати саралаши 9-турида БАА билан 0:0 ҳисобида дуранг ўйнаб, мундиал йўлланмасига эга чиқди. Бу Ўзбекистон тарихидаги илк жаҳон чемпионати бўлади. Шу куннинг ўзида Шавкат Мирзиёев футбол бўйича Ўзбекистон миллий жамоаси бош мураббийи Тимур Кападзега қўнғироқ қилиб, ўз тарихида илк бор Жаҳон чемпионати йўлланмасини қўлга киритган футболчиларга табрик йўллади. Шунингдек, ФИФА президенти Жанни Инфантино ҳам ўзбекистонлик футболчиларни табриклади.