Почеттино: АҚШда футболни жанг деб билмайди

Футбол дунё бўйлаб миллионлаб инсонларни рўбарў қилиб турадиган, ҳиссиётлар ва ғайратнинг уйғунлашган майдони ҳисобланади. Аммо бу ўйинга муносабат ҳар бир мамлакатда турлича. Аргентиналик тажрибали мутахассис Маурисио Почеттинонинг фикрича, АҚШ ҳали ҳам футболнинг асл руҳиятини тўлиқ ҳис этиб улгурмаган.

2024 йил сентябрь ойида АҚШ миллий терма жамоасига бош мураббий этиб тайинланган Почеттино яқиндаги интервьюсида муҳим фикрларни билдириб ўтди. Унинг таъкидлашича, Америкада футболга ҳали ҳам “ёқимли вақт ўтказиш” воситаси сифатида қараш ҳолати сақланиб қолган. У футболни аслида “жанговар руҳ”, “мураккаб кураш” ва “биргаликдаги тарих яратиш” деб ҳисоблайди.

“Бу мен учун қизиқарли синов. Америкада футболга шунчаки кўнгилочар ўйин сифатида қарашади. Ҳолбуки, бошқа мамлакатларда бу ўйин жангга тенглаштирилади. Ҳар бир дақиқада ғалаба учун курашиш керак. Биз футбол жамоавий ҳаракатлар натижасидир, деган тушунчани АҚШда ҳам шакллантиришимиз лозим”, — деди мутахассис.

Почеттинонинг бу сўзлари фақатгина жамоа ичида эмас, балки бутун АҚШ футболида менталитетни ўзгартиришга қаратилган даъватдир. Унинг мақсади — миллий терма жамоани юқори поғоналарга олиб чиқиш, футболга бўлган муносабатни чуқурлаштириш ва Америкада бу спорт турини ҳақиқий рақобат асосида қурилган маданиятга айлантиришдир.

Шу билан бирга, мураббий “терма жамоа” деган ибора шунчаки ном эмаслигини, балки юрт шарафини майдонда ҳимоя қилишга чақирув эканлигини ҳам эслатиб ўтди.

Маълумот учун, Маурисио Почеттино — Европада “Тоттенхэм”, “Пари Сен-Жермен” ва “Челси” клубларида катта тажриба тўплаган, жамоавий ишлаш, интизом ва ҳужумкор ўйин услуби билан машҳур бўлган мутахассис ҳисобланади.

АҚШ терма жамоаси ундан катта натижалар кутаётган бир пайтда, у ўз ғоялари орқали нафақат натижа, балки янги қараш ва янги руҳият ҳам олиб келиши мумкин. Албатта, бу тарихда из қолдириш учун ҳақиқий имкониятдир. «Замин»ни Telegram’да ўқинг!