АҚШ терма жамоаси бош мураббийи Маурисио Почеттино Италиянинг Милан клубига ўтиши борасидаги хабарларга қарамай, бор эътиборини Жаҳон чемпионатига қаратганини маълум қилди. Атланта шаҳрида ўтаётган йиғин давомида мутахассис ўзининг келажаги борасидаги саволларга очиқ жавоб бериб, айни дамда фақат миллий жамоа лойиҳаси билан бандлигини таъкидлади. Бу ҳақда Goal.com хабар беради.
Италия матбуотида тарқалган хабарларга кўра, Милан раҳбарияти ва Маурисио Почеттино ўртасида музокаралар бўлиб ўтган. Мураббий бу учрашувларни инкор этмади, бироқ уларни шунчаки дўстона ва келажак учун имкониятларни ўрганиш деб атади. Унинг сўзларига кўра, футбол оламида бундай мулоқотлар нормал ҳолат ҳисобланади ва бу унинг амалдаги шартномасига таъсир қилмайди.
"Мен шу ердаман ва эртага ҳеч қаерга кетмоқчи эмасман. Бизнинг бор эътиборимиз Жаҳон чемпионати якунига қадар терма жамоага қаратилган. Агар содиқлигим бўлмаганида, ҳозир бу ерда нима қилиб ўтирган бўлардим?" — дея таъкидлади аргентиналик мутахассис матбуот анжуманида.
АҚШ футбол федерацияси раҳбарияти ҳам ушбу вазиятдан хабардор эканини ва хавотирга ўрин йўқлигини билдирди. Ташкилот раҳбари ЖТ Батсоннинг сўзларига кўра, Маурисио Почеттино билан нафақат асосий жамоа, балки олимпия терма жамоаси ва ёшлар футболини ривожлантириш бўйича узоқ муддатли режалар муҳокама қилинмоқда.
Эслатиб ўтамиз, Маурисио Почеттино АҚШ терма жамоасини 2026-йилги Жаҳон чемпионатига тайёрлаш учун ёлланган эди. Милан каби гранд клубларнинг қизиқиши унинг нуфузи юқори эканлигидан далолат беради, бироқ ҳозирча мураббий ўз олдига қўйилган асосий вазифани бажаришга содиқ қолмоқда.
“Zamin”ни Telegram'да ўқинг!
