Маркус Рэшфорд “Барса” учун маошдан воз кечишга тайёрми?

Англия терма жамоаси ва “Манчестер Юнайтед” клуби ҳужумчиси Маркус Рэшфорд келажаги борасида муҳим қарор қабул қилиш остонасида турибди. Marca нашри тарқатган маълумотларга кўра, 27 ёшли футболчи Испаниянинг йирик клуби — “Барселона”да тўп суришни жуда ҳам истайди ва бу орзуси амалга ошиши учун ўз маошини қисқартиришга ҳам рози эканини билдирган.

Маълумотларга кўра, Рэшфорд ўзининг яқин дўстлари ва маслаҳатчиларига “кўк-анорранглилар” сафида ўйнаш унинг футболчилик фаолияти учун энг мақбул ва тўғри қадам бўлишини айтган. Каталония клуби уни ҳозирча устувор трансфер мақсадлар қаторига киритмаган бўлса-да, футболчининг ушбу интилиши вазиятни ўзгартириб юбориши мумкин.

Айни пайтда “Барселона” ҳужум чизиғини кучайтириш учун асосий тарзда Нико Уильямс ва “Ливерпуль”дан Луис Диас номзодларига эътибор қаратмоқда. Бироқ ушбу футболчиларнинг трансфер нархи ва маоши жуда юқори. Шу боис, Рэшфорднинг нисбатан арзонроқ бўлган баҳоси ва клубда ўйнашга нисбатан кучли хоҳиши уни янада жозибадор вариантига айлантирмоқда.

Ўтган мавсумнинг иккинчи ярмида Маркус Рэшфорд “Астон Вилла” сафида ижара асосида тўп сурди. Англия Премьер-Лигасидаги 25 та учрашувда 6 та гол ва 3 та голли узатма билан иштирок этди. Бу кўрсаткичлар мураббийларни тўлиқ қаноатлантирмаган бўлиши мумкин, аммо унинг техникаси, позицион ўйини ва катта тажрибаси "Барселона" каби катта босимли жамоаларда муҳим роль ўйнаши мумкинлигини кўрсатади.

Куни кеча хабар тарқалдики, Рэшфорд “Барса” раҳбариятига фаол музокаралар ўтказиш учун ўз агентлари орқали сигнал юборган. У, шунингдек, трансфер амалга ошса, жамоада ўз ўрнини тўлиқ оқлашга тайёр эканини билдирган.

Эслатиб ўтамиз, Рэшфорд “Манчестер Юнайтед” тарбияланувчиси бўлиб, ушбу клубда 2016 йилдан бери асосий таркибда тўп суриб келаётган. Унинг шартномаси 2026 йилгача амал қилади, аммо у янги йўналишда ўзини синаб кўришни хоҳлаётгани сир эмас.

Каталония клуби ҳужум чизиғидаги танқисликни ҳисобга олсак, “Барса” раҳбариятининг қабул қиладиган қарори нафақат Рэшфорд учун, балки клубнинг янги мавсумдаги тақдири учун ҳам ҳал қилувчи бўлиши мумкин. Қандай бўлмасин, бу трансфер айни пайтда мухлислар орасида қизғин муҳокамага сабаб бўлмоқда. «Замин»ни Telegram’да ўқинг!