"Насаф" клуби ярим ҳимоячиси легионерга айланмоқда

Акмал Мозговой фаолиятида янги босқич бошланди. Ўзбекистон миллий терма жамоаси ва “Насаф” клуби таркибида ўзига хос ўйин кўрсатган ярим ҳимоячи энди БАА чемпионатида ўйнайди.

Таҳририятимиз манбаларига таяниб маълум қиламиз: 26 ёшли маҳоратли футболчи “Бани Яс” жамоаси сафига ўтди. Мазкур трансфер икки клуб ўртасидаги келишув асосида амалга ошган ва футболчи яқин кунларда янги жамоаси билан расман шартнома имзолайди.

Акмал Мозговой “Насаф” тарбияланувчиси сифатида танилган. У нафақат клубда, балки терма жамоада ҳам фаол ҳаракатлари билан эътибор қозонган. Жорий мавсумда у қаршиликлар таркибида 18 ўйинда майдонга тушиб, 2 та гол урди ва 3 та голга ассистентлик қилди. Transfermarkt портали уни 1,5 млн еврога баҳоламоқда.. Унинг техникаси, ўйинни кўра билиши ва жамоавий ҳаракатларга мослашувчанлиги уни бошқалардан ажратиб туради.

“Бани Яс” клуби БАА чемпионатида ўрта тоифали жамоалардан бири ҳисобланади. Бу жамоа сўнгги йилларда маҳаллий ва хорижлик футболчиларни жадал тарзда жалб қилиб, ўз таркибини мустаҳкамлашга ҳаракат қилмоқда. Мозговойнинг трансфери эса бу жараённинг навбатдаги босқичи сифатида баҳоланмоқда.

Футбол мутахассислари ушбу ўтишни ўзига хос ютуқ сифатида баҳоламоқда. Чунки у энди халқаро тажриба тўплаш, ўз салоҳиятини янада намоён қилиш имконига эга бўлади. Бу эса келгусида унинг миллий терма жамоадаги мавқеини мустаҳкамлайди.

Айни пайтда “Насаф” жамоаси учун ҳам ушбу трансфер катта эътиборга сазовор. Чунки клубнинг яна бир тарбияланувчиси легионерга айланди. Бу эса “аждарлар” академияси самарадорлигини яна бир бор тасдиқлайди.

Мухлислар эса Мозговойга БААдаги янги фаолиятида омад тилашмоқда. Уни янги жамоада қандай ўйинлар кутмоқда ва у қай даражада ўзини кўрсата олади – бу саволларга жавоб яқин келажакда аён бўлади. «Замин»ни Telegram’да ўқинг!