Винисиус ўнгда, Мбаппе чапда: "Реал"да зиддият кучаймоқда

Мадриднинг машҳур клуби — "Реал" янги мавсумга жиддий тарзда ҳозирлик кўраётган бўлса-да, жамоа ичидаги стратегик муаммолар олдинги сафга чиқмоқда. Аниқроғи, клубнинг бош мураббийи Хаби Алонсо ҳужумдаги икки юлдуз — Винисиус Жуниор ва Килиан Мбаппе ўртасидаги мавқени қандай ҳал қилишни билмай боши қотмоқда.

Яқинда бўлиб ўтган клублар ўртасидаги Жаҳон чемпионати ярим финалидаги мағлубият муаммони янада яққол намоён қилди. Ушбу беллашувда мадридликлар ПСЖга йирик 0:4 ҳисобида ютқазди. Ушбу учрашувда Винисиус Жуниор ўзи одатланмаган позицияда — ўнг қанотда ҳаракат қилди. Мбаппе эса чапда тўп сурди. Улар орасида эса ёш ҳужумчи Гонсало Гарсияга ўрин берилди.

Журналист Мигель Анхель Диас тарқатган маълумотга кўра, Винисиус Жуниор атрофидаги шахслар бу қарордан кескин норози бўлган. Сабаби, футболчининг ўзи ҳам ўнг қанотда ўзини эркин ҳис қилмаётганини айтган. Унинг ҳаракатлари унчалик самарали кўринмаган ва бу ҳолат унинг руҳий ҳолатига ҳам таъсир қилган.

Таъкидланишича, Винисиус чап қанотда ўйнаганда ўзининг тезлиги, техникаси ва импровизацияси билан рақибларни титроққа солади. Аммо айнан ўша позицияда энди янги юлдуз — Мбаппе ҳаракат қилмоқда. Унинг "Реал"га келиши бутун тактик сўзлашувларни қайта кўриб чиқишни талаб қилмоқда.

Айни пайтда, мадридликлар лагеридан Винисиуснинг потенциал кетиши ҳақида миш-мишлар тарқалмоқда. Унинг позициясига бўлган ишончнинг сусайиши ортидан трансфер ҳақидаги гап-сўзлар янада авж олмоқда. Ҳар ҳолда, у клубга ҳали ёшлигида келиб, етакчига айланган эди. Аммо янги шароитда унинг келажаги ноаниқ кўринмоқда.

Мураббий Хаби Алонсо учун бу осон вазифа эмас. Бир томондан — Мбаппе каби дунё юлдузи ва жамоа учун катта сармоя бўлган футболчини асосий позицияда ўйнатиш зарур. Иккинчи томондан — Винисиус сингари ишончли ва самарали футболчи жамоада ўз ўрнини йўқотмаслиги керак.

Мухлислар орасида ҳам бу мавзуда қизғин баҳслар кетмоқда. Кимдир Мбаппега нисбатан афзаллик берилиши табиий, дейди. Бошқалар эса Винисиуснинг хизматларини қадрлаш керак, деб ҳисоблайди.

Ҳозирча жамоа ичида расман бирор танқидий баёнот берилмаган. Аммо вазиятни мураккаблаштирмаслик учун клуб раҳбарияти ва мураббийлар штаби икки юлдузни майдонда ҳам, шахсан ҳам тўғри жойлаштириш бўйича тезкор қарор қабул қилиши керак.

Акс ҳолда, "Реал"нинг янги мавсумдаги ўйини нафақат тактик, балки психологик жиҳатдан ҳам жиддий босимлар остида бўлиши мумкин. «Замин»ни Telegram’да ўқинг!