Мбаппе полицияга пул бергани билан танқидда

Футбол юлдузи Килиан Мбаппе яна шов-шувли ҳолат билан оммавий ахборот воситаларининг диққат марказига тушди. Бу сафар гап унинг Франция терма жамоаси сафида бўлган даврида хавфсизликни таъминлаган полиция ходимларига йирик миқдорда пул ўтказиб бергани ҳақида кетмоқда.

RMC Sport нашри тарқатган маълумотга кўра, 2023 йил давомида Мбаппе ўз шахсий ҳисобидан 5 нафар полициячига жами 180 300 евро пул ўтказган. Хусусан, тўрт нафар ходимга 30 минг евродан, уларнинг раҳбарига эса 60,3 минг евро миқдорида тўлов амалга оширилган.

Футболчининг ўз айтишича, у бу ҳаракати орқали терма жамоа аъзоларининг хавфсизлигига жавобгар бўлган шахсларни рағбатлантирмоқчи бўлган. Мбаппе бундай тўловни шахсий ташаббус сифатида амалга оширганини таъкидламоқда ва бу ҳолатда ҳеч қандай қонунбузарлик йўқлигини билдирди.

Шу билан бирга, у ҳозирда Франция ҳуқуқ-тартибот органлари билан тўлиқ ҳамкорлик қилишга тайёр эканини маълум қилди.

Айни пайтда бу масала жамоатчиликда кенг муҳокамаларга сабаб бўлмоқда. Баъзи кузатувчилар бу ҳаракатни соф ният сифатида қабул қилмоқда, бошқалар эса полицияга бевосита пул тўланиши мумкин эмаслигини таъкидламоқда.

Килиан Мбаппе спортдаги муваффақиятлари билан бирга жамоатчилик олдидаги ҳаракатлари орқали ҳам доимо ёритиб бориладиган шахс ҳисобланади. Шу боис у билан боғлиқ ҳар қандай воқеа катта қизиқиш уйғотиши табиий. «Замин»ни Telegram’да ўқинг!