Европа футболида ёзги трансфер ойнаси авжида экан, “Реал Мадрид” ҳужумчиси Винисиус Жуниор атрофида ҳам турли миш-мишлар, мухлисларнинг эътиборини жалб этмоқда. Мадрид клуби ўзининг энг асосий футболчиларидан бири бўлган бразилиялик ҳужумчини сотиш эҳтимолини кўриб чиқаётгани ҳақида янги маълумотлар пайдо бўлди.
"Sport" нашрига кўра, “Реал” раҳбарияти Винисиус билан музокараларда аниқ позицияни эгаллаган: агар футболчи ўзининг юқори маошга бўлган талабларини қайта кўриб чиқмаса ва пасайтирмаса, клуб ундан воз кечишга тайёр. Бу қарор клуб сиёсати ва молиявий барқарорликни биринчи ўринга қўяётгани билан изоҳланмоқда.
Маълумки, сўнгги ойларда Винисиус ва “Реал” ўртасида янги шартнома борасидаги музокаралар осон кечмаяпти. 25 ёшли ҳужумчи ўзини клубнинг етакчи юлдузи сифатида кўради ва буни маоши орқали ҳам тасдиқлашга интилаяпти. Бироқ мадридликлар таркибидаги бошқа юлдузлар билан солиштирилганда, унинг молиявий талаблари анча юқори экани клубнинг эҳтиёткор муносабатини кучайтирмоқда.
Айнан шу сабабли, “Реал” Винисиусни сотиш масаласини очиқ қолдирган. Агар ҳужумчи маошини пасайтиришга рози бўлмаса, катта эҳтимол билан янги мавсумда уни бошқа клуб либосида кўришимиз мумкин. Шу билан бирга, мадридликлар ундан фойда олиш ва трансфердан салмоқли даромад кўриш ниятида эканини ҳам яширмаяпти.
Мухлислар ва футбол экспертлари бу жараённи қизиқиш билан кузатмоқда. Сабаби, Винисиус каби юқори даражадаги ижрочи жамоа таркибидан кетса, “Реал”нинг ҳужум чизиғи ва келажакдаги режаларига жиддий таъсир қилиши мумкин. Яна бир жиҳат — бундай трансфер Европа футболидаги балансни ҳам ўзгартиради.
Айни пайтда, Винисиуснинг “Реал” билан амалдаги шартномаси 2027 йилнинг ярмигача кучда. Келгуси ҳафталарда мазкур масала бўйича якуний қарор чиқиши ва футбол оламида яна янги сенсацияларга сабаб бўлиши кутилмоқда. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
