MLS мунтазам чемпионати доирасида "Интер Маями" ўз майдонида "Цинциннати" клубини қабул қилди. Жонли ва кескин ўтган учрашув томошабинларга гол уриш завқини улашолмади — беллашув 0:0 ҳисобида якунланди.
Бу ўйинда маямиликлар ўз етакчилари — Лионель Месси ва Жорди Альбасиз ҳаракат қилишди. Иккала футболчи ҳам яқинда бўлиб ўтган АҚШ ҳамда Мексика юлдузлари ўртасидаги учрашувда қатнашмагани сабабли бир ўйинга дисквалификация қилинганди. Шу боисдан улар жамоасига ёрдам бера олмади.
Ғалабага интилиб, бир неча бор хавфли ҳужумлар уюштирган "Интер Маями"нинг саъй-ҳаракатлари голга айланмади. Шу тариқа клуб очко йўқотди ва жадвалда 42 очко билан Шарқий конференцияда бешинчи ўринда қолмоқда.
Бу пайтда "Цинциннати" 49 очко билан мусобақа пешқадами ҳисобланади. Улар бу учрашувда ҳам мағлуб бўлмаслик сериясини давом эттиришга муваффақ бўлди.
Эндиликда "Интер Маями"нинг кейинги учрашуви ва унда Мессининг майдонга қайтиши футбол ишқибозлари томонидан катта қизиқиш билан кутилмоқда.
«Замин»ни Telegram’да ўқинг!
