25 ёшли ярим ҳимоячи Жоау Феликс ҳақида фикр билдирганлар қаторига Португалия футболида ном қозонган собиқ футболчи Манише ҳам қўшилди. У ўзининг кескин ва аниқ баёнотида Феликснинг фаолияти, қабул қилган қарорлари ва ўйин услуби борасида чуқур таҳлил олиб борди.
Маълумки, Жоау Феликс бу ёзда “Челси” клубини тарк этиб, Саудия Арабистонининг “Ал-Насср” жамоаси сафига қўшилди. Манише эса бу қарор орқали унинг юқори даражадаги футбол ҳаёти охиригача ёниб ўтмаслиги мумкинлигини алоҳида таъкидлади.
— Мен португал матбуотида гапираётган Марио Суарес ва Саулнинг сўзларига тўлиқ қўшиламан. Жоау Феликс бир лойиҳа сифатида қолиб кетди. У ҳеч қачон унинг атрофидан чиқиб, ўз йўлини топа олмади. Орадан беш-олти йил ўтди, лекин ривожланиш кузатилмади, — деди Манише.
У ўз гапида Феликснинг фаолиятидаги турли қарорларини қораламаслигини, лекин бор воқеликни айтиш лозимлигини қўшимча қилди.
— Мен ҳеч кимнинг ҳаёти ёки касбий танловларини танқид қилмоқчи эмасман. Мен ҳам ҳаётимда қарорлар қабул қилганман — баъзилари муваффақиятли бўлган, баъзилари эса йўқ. Феликснинг Саудия Арабистонига кетишини қораламайман. Аммо шуни аниқ айта оламанки, 25 ёшида у ўзининг юқори поғонали карьерасини ёпиш хавфига дуч келган. Саудия лигаси ҳозирча Европанинг топ-5 чемпионатларидан бирига айлана олмайди.
Манише шунингдек, футболчиларнинг баъзан оилавий эҳтиёжларини ҳам ҳисобга олиш кераклигини тан олади. Аммо у Феликснинг узоқ йиллар давомида турли клубларда, кўплаб мураббийлар қўл остида ўйнаб, бирор жойда барқарор ўрин эгаллай олмаганини кескин танқид қилди.
— Футболчи ҳаётида оиласини ўйлаши мумкинлигини тушунаман. У 2027 йилда эркин агентга айланади. Аммо шундай факт борки, у шу пайтгача беш-олтита жамоада тўп сурди, етти-саккизта турли мураббий билан ишлади. Ва уларнинг ҳаммаси битта гапни айтишади: Феликс фақат лойиҳа бўлиб қолди. Беш йилдан бери унинг истеъдоди ҳақида гапиряпмиз, лекин бу гаплардан нарига ўтилмаяпти. Фақат истеъдод етарли эмас. Ўйинчи ўзини тўлиқ футболга бағишлаши, фидокорлик кўрсатиши, бор кучини сафарбар қилиши лозим.
У ўз фикрини янада чуқурлаштириб, Феликснинг фаолиятидаги ютуқлар ва воқелик ўртасидаги тафовутга эътибор қаратди:
— Ҳозир пулни ҳамма топа олаяпти. Кимдир кўпроқ, кимдир камроқ. Аммо, сен фаолиятинг тугаганида, қўлга киритган совринларингга назар ташлайсан. Феликсда фақат “Атлетико” билан олинган Испания чемпионлиги бор. Унда ҳам у доимий асосий таркибда эмасди.
Манише фикрининг якунида эса Феликснинг агентга бўлган омади ҳақида тўхталиб ўтди.
— Мен доим айтаман: Жоау Феликснинг уйида Жорже Мендешнинг ҳайкали бўлиши керак. У дунёда шундай йирик клубларда кўп имкониятларга эга бўлган ягона футболчи бўлса керак, лекин уларнинг бирортасида ҳам ўз ўрнини мустаҳкамлай олмади. Бирортасида футболдан чинакам завқ ололмади. У билан бирга тўп сурган футболчилар битта фикрда: Феликс жамоа учун фидоий эмас, меҳнат қилишни хоҳламайди, футболга бутунлай берилмайди. Ижтимоий тармоқларда чиройли кўриниш мумкин, аммо фарқни майдонда кўрсатиш керак. Ачинарлиси, у ҳеч бир клубда буни амалга оширмаган.
Манишенинг бу гаплари Феликс атрофидаги муҳокамаларни янада қизитиши шубҳасиз. Ижобий умидлар билан бошланган карьера қайси йўналишда ривожланишини эса вақт кўрсатади.
«Замин»ни Telegram’да ўқинг!