"Манчестер Юнайтед" жамоасининг бош мураббийи Рубен Аморим клубнинг мулкдори Жим Рэтклифф билан бўлган шахсий алоқалари ҳақида атрофлича фикр билдирди. Унинг сўзларига қараганда, ўзаро ишонч ва юморга бой мулоқот икки тарафнинг муносабатларини янада мустаҳкамламоқда.
"Биз тез-тез телефон орқали гаплашамиз, у менга хабарлар юборади, гоҳида турли гифлар ҳам жўнатади. Мен ҳам унга ҳазилли жавоблар беришим мумкин. Жим билан ҳамкорлик қилиш ҳақиқатан ҳам осон кечмоқда. Агар сен ўз вазифангни аниқ тушунсанг ва қабул қилган қарорларингни асосли тушунтира олсанг, барча нарса ўз йўли билан бориши турган гап", — деди Аморим BBC нашрига берган суҳбатида.
Шунингдек, мураббий клуб иерархиясидаги ўз ўрнини аниқ англаганини ҳам қайд этди: "Мен Жимнинг клуб эгаси эканлигини яхши тушунаман ва ўз мавқеимни ҳам билиб турибман. Бироқ, айтишим керак бўлган гап бўлса, уни яширмайман, очиқчасига гапираман. Менимча, Жим бундай самимийликни, холис фикрларни жуда қадрлайди".
Ушбу самимий муносабат "Манчестер Юнайтед"даги ички муҳитни янада илиқ ва ишончли қилишга ёрдам бермоқда. Аморимнинг бу каби очиқ мулоқотга бўлган муносабати жамоа ичида ҳам ижобий таъсир кўрсатиши мумкин.
Эслатиб ўтамиз, Англия Премьер-Лигасининг янги мавсуми 1-турида "қизил иблислар" ўз майдонларида катта интригага бой беллашув — "Арсенал" жамоасига қарши ўйинни қабул қиладилар. Бу кутилган тўқнашув 17 август, якшанба куни бўлиб ўтади.
Мухлислар учун ушбу ўйин нафақат мавсум бошидаги муҳим синов, балки мураббий ва раҳбарият ўртасидаги ишончли ҳамкорликнинг илк синови сифатида ҳам баҳоланиши мумкин. "Юнайтед"ни мухлисларини катта умид ва эҳтиёжлар кутмоқда — жамоанинг янги даври бошланмоқда.
«Замин»ни Telegram’да ўқинг!
