29 ёшли испаниялик маҳоратли ярим ҳимоячи Родри Эрнандеснинг “Манчестер Сити” билан келажаги яна футбол оламида муҳокама марказига айланди. Катта эҳтимол билан у жамоада қолади — “шаҳарликлар” унга узоқ муддатли янги шартнома таклиф қилиш ниятида эканини англатувчи маълумотлар пайдо бўлди, деб ёзмоқда инсайдер Фабрицио Романо.
Романонинг билдиришича, Англия Премьер-лигасининг етакчи жамоаларидан бири — “Сити” клуби Родрига 2029 йилнинг ёзига қадар амал қиладиган янги шартнома таклиф этишга тайёргарлик кўрмоқда. Бу келишув амалга ошса, испаниялик футболчи жамоанинг энг кўп маош олувчи юлдузларидан бирига айланиши эҳтимоли юқори. Ҳозирги кунда фақат Эрлинг Ҳоланд ушбу категорияда етакчилик қилмоқда.
Айни пайтда Родрининг “Манчестер Сити” билан амалдаги шартномаси 2027 йил июнигача давом этади. Шу боисдан, клубнинг бу қадами унинг хизматларига бўлган катта ишонч ва узоқ муддатли режаларни англатади.
Қайд этиш керак, сўнгги ойларда испан матбуоти “Реал Мадрид” Родрини ўз сафига қўшишни хоҳлаётгани ҳақида бир қатор хабарларни тарқатган эди. Мадрид клуби Родрига қизиқиш билдиргани ҳақидаги маълумотлар унинг трансфер нархи ва аҳамиятини янада оширди.
Шунингдек, мухлислар орасида Родрининг жорий мавсумда жуда кам иштирок этгани ҳам катта эътиборга сабаб бўлди. У хочсимон боғламидаги жиддий жароҳати туфайли Премьер-лигада атиги 3 та ўйинда майдонга тушган, қолган учрашувларда эса тикланиш билан машғул бўлган.
Бу жараёнга қарамай, клуб унга ишонч билдирмоқда ва уни янада узоқ муддатга жамоада қолдириш учун ҳаракат бошлаган. Тарафлар ўртасидаги музокаралар яқин ҳафталарда фаоллашиши кутилмоқда.
Родри “Сити” сафида кўплаб муваффақиятларга эришган, жамоанинг марказий фигураларидан бири ҳисобланади. Унинг қайта майдонга қайтиши мухлислар учун ҳам, мураббийлар штаби учун ҳам катта аҳамият касб этади. Янги шартнома эса бу ишончнинг яна бир исботи бўлиши мумкин.
«Замин»ни Telegram’да ўқинг!
