Англия Премьер-лигасининг янги мавсуми эндигина старт олганига қарамай, футбол экспертлари ва таҳлилчилари чемпионлик пойгаси атрофидаги баҳсларни қизғин муҳокама қилмоқда. Дастлабки турдан сўнгёқ кўпчилик мутахассислар қайси жамоалар соврин учун асосий даъвогар сифатида кўрилиши мумкинлигини таҳлил қилиб чиқишди.
Кўплаб манбаларнинг фикрича, чемпионлик масаласида асосий рақобат “Манчестер Сити”, “Ливерпул” ва “Арсенал” клублари ўртасида кечади. Бу клублар таркиби, футболчиларнинг индивидуал маҳоратлари ҳамда ўйин услуби жиҳатидан бошқаларга нисбатан юқори савияда шакллангани қайд этилмоқда.
Sky Sports телеканалида эксперт сифатида фаолият юритаётган “Ливерпул”нинг собиқ афсонавий ҳимоячиси Жейми Каррагер эса ўз клуби учун асосий хавф қайси жамоадан келиши мумкинлигини очиқ айтиб ўтди. Унинг таъкидлашича, амалдаги чемпион сифатида “Ливерпул” ҳар қандай ҳолатда ҳам “Манчестер Сити”дан эҳтиёт бўлиши керак.
Эслатиб ўтамиз, ўтган мавсумда “Ливерпул” тарихий ютуққа эришиб, Англия Премьер-лигасида ғолиб чиққан эди. Бу орада эса “Манчестер Сити” тўрт йиллик кетма-кет чемпионлик сериясидан сўнг муваффақиятсиз мавсум ўтказганди. Аммо шунинг ўзига қарамасдан, Гвардиола бошқарувидаги жамоа мавсум охирига бориб ўйинини тартибга солди ва кучли қайтганини намоён қилди.
Каррагернинг таъкидлашича, “Ливерпул” қанчалик кучли кўринмасин, “Сити” доимо асосий рақиб сифатида қаралиши керак.
— “Ливерпул” ҳар доим “Манчестер Сити”дан эҳтиёт бўлади. Ҳатто ўтган мавсумда “шаҳарликлар” заифроқ ўйнашган даврда ҳам улар иккинчи ўринни қўлга киритишга яқин келишганди. Чемпионатнинг охирига яқин “Сити” жуда кучли футбол намойиш қилди. Пеп Гвардиола эса замонамиз футболида энг муваффақиятли мураббий ҳисобланади. У ҳеч қачон иккинчи ёки учинчи ўринга рози бўлмайди. Шу сабабли, “Ливерпул” учун асосий рақиб айнан “Манчестер Сити”дир. Бу жамоани ҳисобдан чиқарганлар яқин орада ўз фикрларида адашганини кўришади, — деди Каррагер.
Унинг фикрича, чемпионлик пойгаси олдидан “Ливерпул” учун қўнғироқ аллақачон чалиниб бўлган. Шундай экан, янги мавсумда асосий рақобат яна Гвардиола жамоаси билан кечишига ҳеч қандай шубҳа йўқ.
«Замин»ни Telegram’да ўқинг!
