Саудия Арабистони Про лигасининг биринчи туридан ўрин олган баҳсда “Ан-Наср” футболчилари сафарда “Ат-Таавун” клубига қарши майдонга тушиб, рақибни йирик 5:0 ҳисоби билан таслим этди.
Учрашувнинг асосий қаҳрамони жамоага янги қўшилган Жоау Феликс бўлди. Португалиялик ҳужумчи уч марта тўп киритиб, ҳақиқий хет-трик муаллифига айланди ва мухлислар олдида ўзини аъло даражада намоён қилди. Шу билан бирга, Европа майдонларида ўз номини мустаҳкамлаб улгурган Кингсли Коман ҳам “Ан-Наср” сафидаги илк голини урди.
Криштиану Роналду эса ўйиннинг 54-дақиқасида пенальтини ишончли ижро этди. Бу 40 ёшли юлдуз ҳужумчининг профессионал фаолиятидаги 940-гол сифатида қайд этилди ва футбол тарихида яна бир мутлақ рекорд янгиланди.
Статистикага кўра, Роналду клублар таркибида 802 марта тўп киритган, шунингдек, Португалия миллий термаси сафида халқаро майдонларда 138 гол муаллифи бўлган.
Мутахассислар фикрича, агар у “Ан-Наср” билан яна икки йиллик шартномаси давомида шу йўсинда ҳаракатини давом эттирса, тарихда биринчи бўлиб расмий ўйинларда 1000 гол чегарасини забт этган футболчига айланиши эҳтимолдан холи эмас.
Мухлислар эса Роналдунинг навбатдаги голлари ва янги рекордларини катта қизиқиш билан кутмоқда.
«Замин»ни Telegram’да ўқинг!
