CAFA Nations Cup-2025 финалида Ўзбекистон – Эрон (1:0) баҳси якунланганидан сўнг, ФИФА раҳбари Жанни Инфантино эронлик футболчиларнинг кийиниш хонасига кириб, уларга самимий сўзлар билан мурожаат қилди.
“Бугун Эрон миллий жамоаси майдонда жуда ҳам аъло даражадаги ўйин кўрсатди. Сизлар бу билан фахрланишингизга тўла арзийди.
Мен сизларга ҳозирнинг ўзида ишонч билан айта оламан – Эрон миллий жамоаси 2026 йилги жаҳон чемпионатида иштирок этади! Демак, АҚШ, Канада ва Мексикада бўлиб ўтадиган Жаҳон чемпионатига хуш келибсизлар!”, — дея таъкидлади ФИФА президенти.
У яна футболчиларга мурожаат қилиб, шундай деди: "Сизлар жаҳон чемпионатига йўлланмани қўлга киритиб, ўз мамлакатингиз ва оилаларингизни фахрлантирдингиз. Сиз 80 миллион эронликни хурсанд қилдингиз. Эронлик футболчилардан бири 1998 йилги Жаҳон чемпионатида менга ўзининг футболкасини совға қилган эди, бу менда ҳозиргача бор ва мен учун қадрли.
Мен Қатардаги Жаҳон чемпионатини эслайман, ўшанда Эрон ва Уэлс ўйнаган, бу ақл бовар қилмайдиган ва ажойиб ўйин эди. Бу футбол туйғуси ва бутун стадион ўрнидан туриб қарсак чалди. Биз дунёни бирлаштиришимиз керак. Сиз жуда яхши ўйнадингиз ва сиз кучли жамоасиз. Футболда ғалабалар ва мағлубиятлар бор ва сиз ҳақиқатдан ҳам кучлисиз ва ўзингиз билан фахрланишингиз керак".
Инфантинонинг ушбу фикрлари Эрон терма жамоаси аъзолари томонидан қўл чапаклар билан кутиб олинди.
Эслатиб ўтамиз, аввалроқ АҚШ ва Эрон ўртасидаги сиёсий тортишувлар туфайли АҚШ президенти Доналд Трамп форслар жаҳон чемпионатида қатнашиш учун Америкага келишига қарши чиққани ҳақида хабарлар тарқалганди.
«Замин»ни Telegram’да ўқинг!
