Мадриднинг машҳур клуби «Реал»даги энг ёрқин юлдузлардан бири ҳисобланган Винисиус Жуниор келажаги борасида яна ноаниқликка дуч келмоқда. Испаниянинг AS нашри хабар беришича, бразилиялик футболчи билан янги шартнома ҳақидаги музокаралар бош мураббий сифатида Хаби Алонсо тайинланганидан сўнг тўхтаб қолган.
Маълумотларга кўра, сўнгги ойларда Винисиус ва клуб раҳбарияти келишувни узайтириш бўйича яқин ҳамкорликда ишлаган, футболчи ҳатто ўзининг молиявий талабларини анча пасайтирган эди. Шу сабабли, икки томон келишувга жуда яқинлашганди. Бироқ Алонсо клубга келиши ва «Реал»нинг клублар ўртасидаги жаҳон чемпионатида иштирок этиши жараённи секинлаштириб қўйган.
Эндиликда кейинги икки-уч ой футболчининг тақдири учун ҳал қилувчи аҳамиятга эга бўлиши кутилмоқда. Агар Винисиус жамоадаги мавқеи ва ролидан қониқмаса, қишки трансфер ойнасиданоқ жамоани тарк этиши мумкин.
Шу билан бирга, мадридликлар ҳужумчини сақлаб қолиш учун охирги чораларни кўриши эҳтимолдан холи эмас. Чунки Винисиус сўнгги йилларда «Реал»нинг асосий ҳаракатлантирувчи кучларидан бирига айланиб улгурган. Унинг тезкорлиги, тўп билан муомаласи ва муҳим ўйинлардаги ғалабага ҳиссаси кўп бора мухлислар ва мутахассислар эътиборини қозонган.
Бу мавсумда 24 ёшли вингер барча мусобақаларда 11 бор майдонга тушиб, 3 та гол ва 2 та ассист билан жамоасига ёрдам берди. Унинг амалдаги шартномаси эса 2027 йилнинг ёзига қадар мўлжалланган бўлса-да, бу келишув узайтирилмаса, «Реал» унинг трансферидан пул ишлаб қолишга мажбур бўлиши мумкин.
«Сантьяго Бернабеу» трибуналарида Винисиусга бўлган ишонч катта, аммо Алонсо келганидан сўнг жамоада тактик ўзгаришлар кутилмоқда. Бу ўзгаришлар ҳужумчининг позицияси ва ўйиндаги ролига ҳам таъсир кўрсатиши мумкин. Шунинг учун келаси ойлар футболчининг «Реал»да қолиш ёки кетиш қарорини белгилаб бериши эҳтимолдан холи эмас.
«Замин»ни Telegram’да ўқинг!
